Qazaqstan Prezıdenti Qytaı Halyq Respýblıkasynyń Tóraǵasy Sı Szınpınmen kezdesti,  - dep habarlaıdy Qamshy aqparattyq agenttigi.

Memleket basshysy Qytaı Halyq Respýblıkasynyń Tóraǵasyna «Bir beldeý, bir jol» forýmyna shaqyrǵany úshin alǵys aıtyp, is-sharanyń jaqsy uıymdastyrylǵanyn atap ótti.

– Forým búkil dúnıe júzi boıynsha bıylǵy eń basty oqıǵanyń birine aınaldy dep oılaımyn. Búgingi forýmnyń ashylýynda sóılegen sózińiz mazmundy boldy, ol elder arasyndaǵy yntymaqtastyqtyń kóp saýalyna jaýap berdi. «Bir beldeý, bir jol» – jańa paradıgma, jańa deńgeıdegi yntymaqtastyq júıesi, – dedi Qazaqstan Prezıdenti.

Nursultan Nazarbaev «Bir beldeý, bir jol» ıdeıasynyń óńirlik deńgeıdegi yntymaqtastyqtyń ǵana emes, sonymen birge túrli qurlyq elderi arasyndaǵy ózara is-qımyldyń kórinisi ekenin atap ótti.

Forýmǵa qatysqan Qazaqstan Prezıdenti Nursultan Nazarbaev  "Bir beldeý, bir jol" bastamasyn júzege asyrý boıynsha bes usynys aıtty.

Nazarbaev forýmǵa qatysyp jatqan 20 memleket jáne úkimet basshylaryna halyqaralyq árekettestiktiń eń basty bes máselesin qarastyrýdy usyndy.  

"Birinshisi, joldardyń ósip kele jatqan tranzıt áleýetin tıimdi ıgerý úshin taýarlardyń ótýin jeńildetetin servıs deńgeıin joǵarylatý kerek ári ákimshilik kedergilerdi joıý qajet, bul maqsatta Qazaqstan naqty sharalar qabyldap jatyr. Al buǵan laıyqty saraptamalar men qarjylandyrý qajet. Azıa bankine osyndaı baǵdarlamalardy belsendi qarjylandyrýy kerek dep esepteımin - bul bolashaqqa ınvestısıa quıý", - dedi Qazaqstan Prezıdenti. 

Nazarbaev ekinshi pýnktinde Jibek joly boıyndaǵy azyq-túlik qaýipsizdigin qamtamasyz etý maqsatynda aýyl sharýashylyǵy kooperasıalaryn damytýdyń mańyzdylyǵyn atap ótti. 

"Úshinshiden, biz ınovasıalyq jáne tehnıkalyq damý salasynda belsendi áriptestik ornatýǵa jumylýymyz kerek. Ǵylymı-zertteý jáne tájirıbe-konstrýktorlyq zertteýler ortalyqtaryn ashýdy birigip qarjylandyrý máselesin qarastyrý oıǵa qonymdy, sondaı-aq, ınovasıalyq tehnologıalar kompanıalary men venchýr qorlaryn qarjylandyrý abzal. Osy kontekste dóńgelek ústel qatysýshylarynyń nazaryn qazaqstandyq ǵalymdardyń Jibek joly halyqaralyq ǵylym akademıasyn qurý boıynsha bastamasyna aýdarǵym keledi. Bul ıdeıany qytaılyq áriptester, sonymen qatar, 16 eldiń ǵylymı mekemeleri qoldady. Bastamaǵa qoldaý kórsetesizder dep úmittenemiz", - dep málimdedi Memleket basshysy. 

Elbasy qorshaǵan ortany saqtap qalý máselesine nazar aýdaryp, tórtinshi usynys retinde kólik kúre joly bolatyn qurlyqishi transshekaralyq ózenderdiń sý resýrstaryn tıimdi paıdalaný máselesin atady. 

"Besinshisi - "Belbeý jáne Jol" ıdeıasynyń basty damý sharttarynyń biri tartylǵan elderdiń ózara senimi men olardyń teń quqyly ártarapty áriptestikke daıyndyǵy ekeni sózsiz, buǵan osy forýmdy budan keıin de ótkizý yqpal eter edi. Osy proseste Azıadaǵy senim árekettestigi boıynsha jıyndar jaqsy kómekshi bola alady, onyń aıasynda qaýipsizdik senimi sharalaryn nyǵaıtý boıynsha áriptestik tájirıbesi mol", - dep qorytty Nursultan Nazarbaev. 

Prezıdenttiń sózinshe, Qytaı "Bir beldeý, bir jol" bastamasyn kóterýi arqyly álemge óńirlik kooperasıanyń jańa modelin kórsetti. Bul ádis - "birikken damý arqyly turaqtylyqqa qol jetkizý" - halyqaralyq áriptestiktiń jaǵymdy formasy, ol osy jol boıynsha ondaǵan eldiń ekonomıkalyq múddesin kórsetedi. 

"Jyl saıyn Tynyq muhıtynan Atlantıkaǵa deıin jańa ári jyldam baǵyttar ıgerilip jatyr, onyń arqasynda Eýrazıanyń ózindegi saýda kólemi 2020 jyly 1,2 trıllıonnan asady dep boljanyp otyr", - dedi Elbasy.