Jeńil salmaqta UFC chempıony, ırlandıalyq Konor MakGregor amerıkalyq boksshy kishi Floıd Meıvezermen boks erejesi boıynsha jekpe-jek ótkizý úshin kelisimshartqa qol qoıǵanyn aıtty, dep habarlaıdy Qamshy aqparattyq agenttigi Vesti.kz basylymyna silteme jasap.
"Maǵan Zuffa LLC, The Ultimate Fighting Championship jáne Paradigm Sports Management sekildi meniń áriptesterimmen bul rekordtyq kelisimshartqa qol qoıǵanyma qýanyshtymyn. Bul tarıhı jáne mańyzdy oqıǵaǵa qol qoıyp, kelisimimdi berdim. Bul ispen aınalysqan barlyq áriptesterimdi quttyqtaımyn. Endi El Heımanmen onyń boksshysynyń (Floıd Meıvezer - red) qol qoıǵanyn kútemiz", - dep habarlaıdy MakGregordyń resmı saıty themaclife.com. 
15 mamyr kúni UFC prezıdenti Dana Ýaıt MakGregor men Meıvezer arasyndaǵy kezdesýdiń barlyq sharttary kelisilgenin málimdedi. Business Insider portalynyń málimeti boıynsha, bul kezdesýdi úshin ırlandıalyq sportshy 75 mıllıon dollar, al amerıkalyq boksshy 100 mıllıon dollar kóleminde syıaqy alady eken. 
MakGregor men Meıvezer arasyndaǵy jekpe-jek týraly eń alǵashqy aqparattar 2016 jyly paıda bolǵan edi. Ol kezde tipti jekpe-jek úshin 10 maýsymda Las-Vegastaǵy sport keshenin jaldap qoıǵany da habarlanǵan. 
Al jýyrda UFC prezıdenti MakGregor men Meıvezer arasyndaǵy jekpe-jekti 16 qyrkúıekte ótkizýdi josparlaǵanyn aıtty. Biraq keıinnen bul kúnde meksıkalyq Saýl "Kanelo" Alvares pen qazaqstandyq Gennadıı Golovkın arasyndaǵy jekpe-jek ótetini belgili boldy. 
40 jastaǵy Meıvezer kásipqoı boks sharshy alańynda 49 kezdesý ótkizip, barlyǵynda jeńiske jetti. Onyń amerıkalyq boksshy 26-da qarsylastaryn nokaýtqa jibergen. Konor MakGregor bolsa MMA erejesi boıynsha 24 kezdesý ótkizip, 21 kezdesýde jeńiske jetse, úsheýinde jeńilip qalǵan.