Jazylǵan hat sekildi halqymdaǵy,
Aqsaqal ór minezdi nar tulǵaly.
Aıytpaqshy bir áńgime bastan ótken,
Qoımanyń ashylǵandaı altyndary.
Tentirep taý dalany el kezip ketken,
Úrkitip er kóńildi sezikti etken.
Jasalyp qoldan ashtyq qazaǵyma,
Eńsesin el-jurtymnyń ezip ketken.
Tartqyzyp qara sıyr, qaragerdi,
Asyǵyp aýǵan elge jaıaý erdi.
Bir kúnde ata qonys arman bolyp,
Jyraqtap kóz ushynda qala berdi.
Sekildi aýǵan ańdaı arqalardan,
Analar jaıaý bala arqalaǵan.
Jerleýge ólgenderdi dirmany joq,
Tek qana beti- júzin qalqalaǵan.
Shaptyrǵan toq attaıyn tezektetip,
Qoıǵan – Aı qý taǵdyrdyń bezektetip.
Bes bala bes jaǵynan shyrqyraıdy,
Súıreıdi áke-sheshe kezektesip.
Talǵaý qyp sý men shóptyń tamyrlaryn,
Kóripti úlken olja tabylǵanyn.
Kezikse óli tyshqan etikke sap,
Umytqan asqazannyń aýyrǵanyn.
İlinip asqar taýdyń qıasyna,
Muń shaqty jýsany men mıasyna.
Qushaqtap balalaryn jylaıdy eken,
Qyzyǵyp qaratorǵaı uıasyna.
Ashtyqqa shydaı almaı balalary,
Bir úzim nanǵa jetý bar armany.
Kóretin bar shyǵar dep kúnim alda,
Bul omyr tek úmitten jaralady.
Urpaǵyń úmitińdi jalǵaıdy anyq,
Bir belgi odan basqa qalmaıdy anyq.
Qozy kósh jerge jetý qıyn bop tur,
Tóbeler ketken syndy taýǵa aınalyp.
Qyrylyp keteme dep balalary,
Bir kúdik áke janyn jaralady.
Qaraıdy beseýine qaıta-qaıta,
Eńbektiń moıymaǵan qara nary.
Aıazy azba ómirdiń qarymaǵan?
Arǵymaq azba aqsap arymaǵan.
Altynnan artyq bolyp bir úzim nan,
Iini eldiń asqa jarymaǵan.
Qalmady boıda shama qozǵalarǵa,
Jiberer qandaı bir kúsh qozǵap alǵa.
Jumyr jer ketti me eken solqyldap byr,
Qushaqtap bes balasyn bozdaǵanda.
Kele almaı bir sheshimge, bir baılamǵa,
Egilip ıen dalada jylaıdy ana.
Qataldyq pa joq álde meıirim ba,
Til qatty áıeline yńǵaılana.
– Ómirdiń óshirem be janǵan baǵyn,
Urpaǵym aman bol dep armandadym.
Soıaıyq shıki ókpeni etin asyp,
Qutqaryp qalý kerek qalǵandaryn.
Aspannan jaı túskendeı qas-qaǵymda,
Ananyń bulyt oınady aspanynda.
Shyrqyrap kózinen jas yrshyp shyǵyp,
Tógildi tarlan taýdyń tastaryna.
Qanatyn qaǵar úmit tynbaı máńgi,
Jasyl mań janarynda qumǵa aınaldy.
Ákeniń qalmaǵandaı basqa amaly,
Qol salyp kezdigine yńǵaılandy.
İlinip jetken edi taıaǵyna,
Qudaı-aý zaman aqyr taıady ma? !
– Asaıyq bir belesten keziger juryt,
Jyǵyldy jalbarynyp aıaǵyna.
Jyljydy tasbaqanyń júrisimen,
Qoldasyp, qoltyqtasyp tirisimen.
Anany byr qorqynysh bılep ketti,
Týylar arbyr bala irisimen.
Bir jolǵa áke baıǵus aıap qaldy,
Bir kúdik júreginde aıaqtandy.
El-jurty kezikpese ne istemek,
Tóbege jańaǵy aıytqan taıap qaldy.
Aldady bir úmiti, bir armany,
Teńselip qoldy-aıaqqa tura almady.
Jaý shapsa, Naýqastansa bir jón edi,
Qıyn ǵoı óz qolynan tiri alǵany.
Jalańdap ótkir kezdik kóp qaıralǵan,
Kezdikti kórip ana toqtaı qalǵan,
Shyryldap sheshe baıǵus júgiredi,
Sekildi kóbelekteı otty aınalǵan.
Zarlady sheshe baıǵus taǵyda bir,
Jan edi jýytpaǵan janyna kir.
Asaıyq bir belesten múmkin azyq,
Jolyǵar balalardyń baǵyna bir.
Osy edi sońǵy úmit, sońǵy armany,
Tabyla qoıarma eken joldan baǵy.
Tiri alyp qalý ushyn náresteni,
Jón bolar qandaı tásil qoldanǵany.
Buǵynyń aýyz shaıqar mezgili edi,
Júregin aýyr oılar ezgiledi.
Balasy baýyr etin qalaı jemek?
Qorqytqan jan jarynyń kezdigi edi.
Shek barma Jaratqannyń sheberine,
Keltirer arbir isti kemeline.
Synaqqa shydaı almaı shamdanamyz,
Allanyń ekilenip bererine.
Búk túsip sary dala dóńi jatqan,
Keremet qyr astynda bolyp jatqan.
Súzisyi eki buǵy ilinisip,
Dińkelep aýzynan aq kóbik aqqan.
İlingen uı ishimen súırelesip,
Ólmeske tańir ózi quıdy nesip.
Buǵylar qozǵalýǵa shamasy joq,
Tiresken, múıizdesken, súırelesip.
Aýyr sóz adyra qap aýyzdaǵy,
Úmittiń otyn qudaı tamyzdy áni.
Qýanyp sý tapqandaı quba shólden,
Tezdetip buǵylardy baýyzdady.
Anamnyń ajyramaı qushaǵynan,
Ákemniń aman qaptym pyshaǵynan.
Qaıranmyn qalaı aman qalǵanyma,
Anamdy aıyqtyryp qusa-muńnan.
Shashylyp saı-salaǵa súıekteri,
Qazaqtyń basynan ne kún ótpedi.
Taǵdyry tússede myń tar synaqqa,
Ańsady azattyqty júrekteri.
Artqa sap tarıhtyń sandal belin,
Es jıyp, eńsesi ósip jandandy elim.
Ańsaǵan azattyqqa qol jetkizip,
Kógimde kúnim týdy samǵar meniń.
Solaı bir aman qalǵam ólimenen men,
Táýbe dep bul kúnime kóńildenem.
Tússede shybyn janyń san synaqqa,
Úmitke toly eken ǵoı omyr degen.
Qaster Akıza uly
