Astanada ótetin EKSPO-2017 halyqaralyq kórmesinde Sıngapýr óz ónimderin kópshilikke «Shaǵyn qala – úlken ıdeıalar» degen uranmen usynbaq. Bul týraly «Nur Otan» partıasy Tóraǵasynyń Birinshi orynbasary Muhtar Qul-Muhammedtiń atalǵan elge sapary barysynda belgili boldy.
Kórme kezinde Sıngapýr delegasıasyn Qazaqstanǵa el Parlamentiniń spıkeri Halıma Iakýb bastap kelmek. Osyǵan oraı Muhtar Qul-Muhammed H.Iakýbpen arnaıy kezdesti. Kezdesýde qos tarap Qazaqstan men Sıngapýr qarym-qatynasyndaǵy ózekti máselelerdi talqylady. Muhtar Abraruly Parlament spıkerine ultaralyq jáne konfesıaaralyq kelisimge, tózimdilikke, Qazaqstan halqynyń birligine negizdelgen Elbasy saıasatynyń mańyzy jaıynda maǵlumat berdi.
Al bul kezdesýden keıin resmı Sıngapýr men Astana arasyndaǵy áriptestiktiń artatynyna senim bildirgen H.Iakýb: «Qazaqstan Prezıdenti Nursultan Nazarbaev pen Sıngapýrdyń tuńǵysh premer-mınıstri Lı Kýan Iý negizin qalaǵan eki eldiń yntymaqtastyǵy aldaǵy áriptestigimizdiń berik irgetasy bolýy tıis. Nursultan Nazarbaev ár isti strategıalyq turǵyda baǵamdaıtyn kóregen saıasatker. Ol bolashaqta Qazaqstannyń qarqyndy damyǵan ekonomıkasy bar, ozy tehnologıalarmen qamtamasyz etilgen, jastary bilimdi el bolǵanyn qalaıdy jáne sol maqsatqa jetý úshin qolda bar múmkindiktiń barlyǵyn jasap keledi», – dedi.
Sondaı-aq, «Nur Otan» partıasy Tóraǵasynyń Birinshi orynbasary Muhtar Qul-Muhammed Sıngapýrdiń Premer-mınıstri, Halyqtyq is-áreket partıasynyń Bas hatshysy Lı Sán Lýnmen, osy partıanyń tóraǵasy Kho Býn Vanmen jáne Lı Kýan Iý atyndaǵy Memlekettik saıasat mektebiniń rektory Kıshore Mahbýbanımen kezdesti. Odan bólek, Qazaqstandyq delegasıa Nanán tehnologıalyq ýnıversıtetiniń robottar jasaıtyn ǵylymı-zertteý ortalyǵynda boldy.
Buǵan deıingi partıagerler kóbinese Reseıge, KPSS shapanynan shyǵa almaǵan edınorostarǵa qarap alańdaıtyn edi. Muhtar myrzanyń keshe Japonıa, búgin Sıngapýr sıaqty Azıa jolbarystaryna qaraı bet burǵany ábden durys eken. Qazaqstan barysy tegi bólek orys aıýyna emes, ózine jaqyn jolbarystarmen qatar jortqany abzal.
