Qamshy aqparattyq agenttiginde 31 mamyrda «Keıbir azamattar Qytaıǵa ketken týystarynyń negizsiz qamalyp, oralmaı jatqanyn aıtady» atty materıal jaryq kórip, qatty talqylandy. Onda qujattyq qıyndyq kórgen birneshe ondaǵan azamattyń Qytaı bıligi delegasıasymen elshilik arqyly sóılesip, bazynasyn jetkizbek bolǵany aıtylǵan. Qoǵam belsendisi Erkin Beısekeı osy máselege Qazaq bıliginiń de aralasyp, Qytaı tarapynan resmı túsinikteme alýyn talap etedi. Óıtkeni Qytaıdaǵy zań buzýshylyqtar tipti Qazaqstan azamatynyń tólqujatyn tartyp alýǵa deıin jetken.
«QR premer mınıstri Baqytjan Saǵyntaev myrzaǵa;
Dúnıejúzi qazaqtar qaýymdastyǵy tóraǵasynyń birinshi orynbasary Talǵat Mamashevqa;
Qazaqstannyń QHR-daǵy tótenshe jáne ókiletti elshisi Shahrat Nuryshevqa;
Dúnıeniń tórt buryshyna, Álemniń 55 memleketine taraǵan qazaqtar kóshi 25 jyldan beri jalǵasyp keledi. Alaıda, sońǵy jyldarda QHR-dan etnıkalyq qazaqtardyń Atajurtqa betalysy qujattyq kedergiler esebinen qıyndap ketti. Ondaı qıyndyqtyń biri Qytaıdan Qazaqstanǵa kelip, óz otbasylaryn biriktirý maqsatynda Qazaqstan tarapynan beriletin Yqtıarhatty alaǵan etnıkalyq qazaqtardyń basyndaǵy jaǵdaı. Olar atalǵan qujat arqyly eki el arasynda emin-erkin júrip tura alýǵa tıis. Sol arqyly óz otbasylaryn Qazaqstanǵa kóshirip, bala-shaǵasyn elge ákelip, azamattyq alýyna, oqyp bilim alýyna jaǵdaı jasaıdy. Alaıda, Qytaı halyq respýblıkasy osyndaı qujaty bar baýyrlarymyzǵa qatty qysym jasap, sońǵy ýaqytta qysymdy kúsheıte tústi. Atap aıtqanda olardyń Qytaı aýmaǵynda júrgenin paıdalanyp, zańsyz túrde Yqtıarhatyn tartyp alý faktileri jıiledi. Tipti Qazaqstannyń azamattyǵyn alǵan keıbir adamdardyń da shetel azamaty bolǵanyna qaramastan tólqujattaryn tartyp alý kórinis alýda. Al, Yqtıarhat alǵan azamattardyń kóbiniń otbasy Qazaqstanda. Iaǵnı beıbit zamanda bir otbasy ekige bólinip, el men eldiń arasynda qalyp jatyr. Osyǵan baılanysty Qytaı bıligi eshqandaı túsinikteme bergen joq. Tipti, qamaý, sottaý faktileri bolǵan. Sizderden suraıtynymyz Qytaı bıliginen resmı túrde túsinikteme alsańyzdar jáne olqylyqtyń ornyn toltyrsa deımiz.
Sanaýly kúnnen keıin elimizdiń dańqyn álemge pash etetin «Astana EXPO-2017» ulttyq kórmesi ótedi. Qazaq eliniń qýanyshyn, maqtanyshyn pash etetin atalǵan sharaǵa kelmekshi bolyp otyrǵan myńdaǵan qandastarymyz osyndaı qujattyq qıyndyqtar sebebinen kele almaı otyr. Olardyń qujattaryn jınap alyp, sebebin túsindirmesten 1 qyrkúıekke deıin berilmeıdi degen. Iaǵnı, EXPO-ǵa qatysýǵa resmı shekteý qoıyp otyr. Qytaıdaǵy baýyrlarymyzdyń adamı quqyqtary taptalyp jatyr. Osyǵan baılanysty memlekettik deńgeıde bir jaýap berilýin suraımyz».
QHR tóraǵasy Sı Szınpın 7-10 maýsym aralyǵynda Qazaqstanǵa kelip, Shanhaı yntymaqtastyq uıymynyń (SHYU) samıti jáne «Astana EKSPO-2017» halyqaralyq kórmesiniń ashylý saltanatyna qatyspaq. Osy oraıda Qytaı bıliginen bir suraqqa jaýap alý úkimetimizge qıynǵa soqpas.
Erlan Tóleýbaı
