2016 jyly 5 maýsymda Aqtóbede terakt boldy. Terrorısterdiń toby «Pallada» jáne «Pantera» atty qarý-jaraq dúkenderi men №6655 áskerı bólimine qaraqshylyq shabýyl jasap, sonyń saldarynan 8 adam mert boldy. Olardyń 3-ýi áskerı qyzmetkerler. Qalada terorıstik qaýip-qaterdiń joǵarǵy «qyzyl» deńgeıi jarıalandy. Terorızmge qarsy baǵyttalǵan operasıa barysynda 18 adamnyń kózi joıylyp, 9 adam quryqtaldy. Nursultan Nazarbaevtyń jarlyǵymen 9 maýsym azaly kún dep jarıalandy. Ishki ister mınıstri Qalmuhanbet Qasymov Aqtóbedegi atys kezinde 21 adam qaza bolyp, 6-7 adamǵa izdeý salynǵanyn aıtty. 38 adam jaraqat aldy.
Lańkestik jasaǵan salafıttermen atysqan aqtóbelik polıseı «Altyn adam» ataǵyn ıelendi.
Shabýyldan soń elde terorıstik qaýip-qaterdiń qalypty «sary» deńgeıi jarıalanyp, ol keıin birneshe ret uzartylyp, bıyl qańtarda ǵana joıyldy.
Byltyr 28 qarashada Aqtóbe oblystyq sotynda qarýly shabýylǵa qatysty 29 adamǵa úkim shyqty. Qarý-jaraq dúkenderi men áskerı bólimdi basyp alýǵa tikeleı qatysty dep aıyptalǵan jeti adam ómir boıy bas bostandyǵynan aıyryldy. Basqa aıyptalýshylar túrli aıyptarmen eki jyldan 22 jylǵa deıin sottaldy. Bir adam qylmysty jasyrdy degen aıyppen tórt jylǵa bas bostandyǵyn shekteý jazasyn aldy. Bıyl qańtarda apelásıalyq sot úkimdi kúshinde qaldyrdy.
Keıinnen terrorlyq shabýylǵa qatysýshylardyń ózekti órtegen ókinishteri men oqıǵa kýágerleriniń estelikteri toptastyrylǵan «Orazadaǵy oıran» fılmi jaryqqa shyqty.
