Semeı turǵyny Ózbek túrmesinde qamaýda jatyr, dep habarlaıdy Qamshy aqparattyq agenttigi KTK Arnasynyń málimetine súıenip. Otandasymyz Vıtalıı Nenchenko kórshi eldegi týystaryna barmaq bolǵan kórinedi. Alaıda onyń uıaly telefonynyń ishindegi beınerolık ózbek polısıasynyń kúdigin týdyrǵan. Al zar qaqan jaqyndary onyń tipti qandaı rolık bolǵanyn bile almaı dal. Tek, Vıtalıı Nenchenkonyń 10 jylǵa deıin bas bostandyǵynan aıyrylýy múmkin ekenin, sondaǵy qorǵaýshylarynan bilipti.
Vıtalıı Nenchenko demalysynda otbasymen birge Tashkent- Samarqand- Buqarada turatyn týystaryn aralamaq bolǵan. Alaıda, shekaradan óte sala ózbek quzyrly oryndarynyń kózine túsipti. Uıaly telefonyn teksergen «Keles» stansıasyndaǵy polıseıler sol jerde jibergenimen, keıin qolyna kisen salǵan. Oǵan sebep, WhatsApp mesendjeri arqyly kelgen eki beınerolık kórinedi. Al, jarynyń aıtýynsha, ózi muny kórmek túgeli, júktep te úlgermegen.
Tamıla Beksheneva, Vıtalıı Nenchenkonyń jubaıy:
-Biz 5 kún emin-erkin júrdik. Vıtalııge túsinikteme jazdyryp jibergen bolatyn. Sóıtip, Samarqand pen Buqarany túgel araladyq. Eger kinási bolsa, qashyp ketýimizge bolatyn edi ǵoı. Biraz kúnnen soń joldasymdy shaqyrdy. Prokýrormen sóılesse kerek, 28-shi mamyr kúni birden maǵan qońyraý shalyp, qorǵaýshy taýyp kelýimdi surady.
Otandasymyzdyń osyndaı aıyppen kórshi elde qamaýda jatqanyna eki aptaǵa jýyq ýaqyt boldy. Al, onyń amandyǵyn bile almaǵan jaqyndary ne isterin bilmeı dal. Tek, Vıtalııge qatysty qylmystyq is qozǵalǵany týraly sondaǵy qorǵaýshylarynan estipti.
Iýlıa Medvedeva, Vıtalıı Nenchenkonyń qaryndasy:
-Onda eshqandaı ekstremıstik baǵyt joq. Ózi dinge de sondaı berilmeıtin. Tipti, 37 jasyna deıin qylmystyq turmaq, ákimshilik jaýapkershilikke de tartylmaǵan bolatyn.
Elimizdiń Syrtqy ister mınıstrligi, bul isti Ózbekstandaǵy elshilik baqylaýǵa alǵanyn jetkizdi. Alaıda, Vıtalııdiń jaǵdaıy ázirge belgisiz kórinedi.
Esterińizge salsaq, 5 jyl buryn taǵy bir otandasymyz ózbek túrmesine qamalǵan bolatyn. Onyń da qolyndaǵy netbýgynan kúdikti vıdeo tabylyp, ekstremıstik ýaǵyz júrgizdi degen aıyppen aqyry 5 jylǵa sottaldy. Vıtalıı Nenchenkonyń jaqyndary da endi osylaı 10 jylǵa deıin sottalyp ketedi dep úreılenip otyr.
Sholýshy: Aıgerim TAÝBAI
