Búgin Atyraý oblysy boıynsha Qazaqstan halqy assambleıasynyń 21 sesıasy ótti. Sesıada Elbasynyń «Bolashaqqa baǵdar: rýhanı jańǵyrý» maqalasynda baıandalǵan mindetterdi iske asyrýǵa Assambleıanyń qatysýyn uıymdastyrý jáne Memleket basshysynyń Qazaqstan halqy Assambleıasynyń HHV sesıasynda bergen tapsyrmalaryn oryndaý sóz boldy. Jıynǵa assambleıa músheleri, etnomádenı birlestikterdiń basshylary, oblystyq assambleıanyń ǵylymı-sarapshylyq toptary, qoǵamdyq kelisim jáne analar keńesiniń músheleri, oblystyq basqarma jáne aýdan basshylary men jastar qatysty.
Sharany oblysy ákimi, Assambleıanyń Atyraý oblysy boıynsha tóraǵasy Nurlan Noǵaev ashty. Ol Elbasynyń baǵdarlamalyq maqalasyn iske asyrýdaǵy bul ınstıtýttyń róliniń erekshe ekenin tilge tıek ete otyryp, alda turǵan mindetti oryndaýda atyraýlyqtardy yqylaspen eńbek etýge shaqyrdy.
“Ultyn súıip, ult taǵdyryn óz taǵdyrymen baılanystyratyn árbir azamat bul mindetterdi qýana qabyldap, onyń atqarylýyna jumyla kirisedi degen senimdemiz. Aldymyzda aýqymdy mindetter tur: jaýapkershilik joǵary, suranys ta salmaqty bolmaq”, – dedi ol.
Jıynda baǵdarlamany iske asyrý úshin ár baǵyt boıynsha júıeli jumystyń júrip jatqany aıtyldy.
Máselen, “Týǵan jer” jobasyn atqarý úshin oblysta sarapshylar jáne jumys toby qurylyp, onyń naqty jumysqa kirisip ketkeni belgili boldy. Joba aımaqtaǵy Halel Dosmuhamedov ýnıversıtetiniń ǵylymı potensıalynyń negizinde iske aspaq.
Josparlanǵan sharalardyń ishinde oblys mektepterinde fakúltatıvtik kýrs retinde «Ólketaný» pániniń engiziletini, aımaqtyń mádenı oryndary men tarıhy týraly kitapshalardyń basylatyny, tarıhı eskertkishterdiń restavrasıalanatyny, qalanyń ınfraqurylymyn damytý baǵytyndaǵy áleýmettik jobalardyń tizimi jasaqtalyp, túrli aksıalar men muqtaj jandarǵa áleýmettik kómektiń beriletini, týrısik kartanyń jasaqtalatyny, osy sıaqty basqa da bastamalardyń júzege asatyny aıtyldy.
Aımaq basshysy bul mindetti iske asyrýda, azamattardy týǵan jerine qamqorlyq tanytýǵa yntalandyrýda assambleıanyń róli erekshe dedi.
Bul tusta Maǵaýıa Merǵalıev atty kásipkerdiń 800 mıllıon teńge jumsap týǵan jeri Qulsary qalasyna 165 oryndyq balabaqsha salyp bergeni úlgi retinde aıtyldy.
Jıynda oblystaǵy etno-mádenı birlestik músheleri men aımaqtyń damýyna eńbegi sińgen kásipkerler men jaýapty qyzmetkerler sóılep, usynys-pikirlerin aıtty. Birlik pen turaqtylyqty nyǵaıtýǵa, Qazaqstannyń áleýmettik-ekonomıkalyq jáne qoǵamdyq damýyna zor úles qosqan birqatar azamattar Qazaqstan halqy Assambleıasynyń jáne oblys ákiminiń Alǵys hattarymen marapattaldy.
Sesıadan soń jıylǵandar Atyraý oblystyq Qazaqstan halqy assambleıasy uıymdastyrǵan konsertti tamashalady.
