Ońtústik Qazaqstan oblysynda 13 jastaǵy mektep oqýshysy sýǵa batyp bara jatqan kishkentaı búldirshindi qutqaryp qaldy, dep jazady Qamshy aqparattyq agenttig 24.kz-ke silteme jasap.
Demejan Altaı muzdaı sýǵa tunshyqqan bir jasar sábıge alǵashqy medısınalyq kómek te kórsetken. Jasandy tynys alý ádisin qoldanyp, aman alyp qalǵan. Baǵys aýylynyń turǵyndary Demejannyń erligine dán rıza.
Árbir úıde mektep oqýshysynyń bir jarym jasar Erjandy qalaı qutqarǵany aıtylyp jatyr. Kishkentaı búldirshin bir sátke ata-ananyń qadaǵalaýynsyz qalyp, aǵyny qatty aryq sýyna qulap ketken. Oqys jaǵdaı osy aryqtyń boıynda bolǵan.
Aýyl turǵyndarynyń aıtýynsha, taý ózeni búgin qaýipsiz bop kóringenimen, sol kúni tereńdigi eki metrden asyp aǵyp jatypty. Osy mańda turatyn mektep oqýshysy Demejan Altaı úıinen kóshege shyqqanda kishkentaı balalardyń kómek surap, aıqaılaǵan daýysyn estıdi. Birde ózenge qaraı júgirip, aǵyp bara jatqan kishkentaı balany qutqarýǵa asyǵady.
Demejan Altaı, Baǵys aýylynyń turǵyny: – Eki kishkentaı bala keldi de maǵan inim sýǵa aǵyp ketti dedi. Men úıdiń artyna qaraı tústim de jan-jaǵyma qaradym. Bala kórinbedi. Keıin sýǵa batqan bár nárse kórindi. Sýǵa tústim de balany qutqaryp, sýdyń jaǵasyna shyǵardym. Bala dem almaı jatty. Kógerip, jaýrap qalǵan eken.
Jetkinshek balany sýdan alyp shyǵyp qana qoımaı, oǵan alǵashqy medısınalyq kómek kórsetipti. Jasandy tynys alý ádisin jasaǵan. Keýde tusynan basyp, dem alýyna kómektesken. Qutqarýshylar dál bulaı eresek adamdardyń ózi isteı almas edi dep, Demejannyń erligine rızashylyqtaryn bildirdi.
Ǵalymjan Qambarov, Saryaǵash aýdandyq Tótenshe jaǵdaılar basqarmasynyń basshysy: – Negizinde Demejan sol kúni jarysqa ketýi kerek eken. Aǵaıyna bir sebeptermen men jarysqa bara almaımyn degen eken. Bul – Jaratqannyń belgisi. Demejan sol kúni jarystan qalyp, ana balanyń ómirin aman alyp qaldy. Qazirgi ýaqytta Demejannyń batyrlyǵy úshin biz endi departamenttiń basshylyǵynan adamdy qutqarý tósbelgisimen marapattaý týraly suraımyz.
Osylaısha kishkentaı Erjan qaıta ómirge keldi. Qýanyshyn jasyra almaǵan ananyń ulyna ómir súrý baqytyn syılaǵan kórshisine aıtar alǵysy sheksiz.
Jańylaı Qaltursynova, Baǵys aýylynyń turǵyny: – Men qatty qoryqtym. Balam bir ólip tirildi. Qalaı bolǵany aıtyp jetkize almaımyn. Demejanǵa úlken raqmetimdi aıtamyn. Balamdy qutqaryp qalǵany úshin Alla razy bolsyn! Endi 13 jastaǵy Demejan Altaı naǵyz batyrǵa aınaldy. Onyń erligi jaıyndaǵy ańyz-áńgimeler týǵan aýylynan alysqa tarap ketti.
Sholýshy: Aıgerim TAÝBAI
