Kókshetaý kolejinde stýdentterden aqsha jınaýǵa qatysty daý shyqty, - dep habarlaıdy, Qamshy aqparattyq agenttigi tengrinews.kz-ke silteme jasap.
Qala kolejderiniń birinde búdjet qarajatyna bilim alyp jatqan stýdentter aı saıyn 10 myń teńge tólegen bolyp shyqty. Bul jaǵdaıdy Aqmola oblysynyń Bilim basqarmasynyń ókilderi anyqtaǵan. Osyǵan baılanysty oqý ornynda tekseris ótkiziledi.
"Bul kolejben bizde tehnıkalyq mamandyqtar boıynsha búdjettik oryndardy ornalastyrý týraly kelisimshart bar. Búdjet qarjysyna oqyp jatqan stýdentter tegin bilim alýǵa quqyly, eshqandaı qosymsha qarjy tóleýge mindetti emes. Budan basqa amaldar zańdy buzý bolyp sanalady", - deıdi Bilim basqarmasy basshysynyń orynbasary Valerıı Gamazov.
Alaıda kolej basshylyǵy aı saıynǵy tólemder demeýshilik maqsatta bolǵandyqtan, aqsha jınaýdyń zańdy ekenin aıtady.
"Búdjetten qarjy oqytýshylardyń eńbekaqysyna ǵana bólinedi. Al komýnaldyq qyzmetke aqshany qaıdan alamyz? Materıaldyq-tehnıkalyq qurylǵylarǵa? Oqýlyqtarǵa? Bilim basqarmasynan bul memlekettik tapsyrysty almas buryn ata-analardy jınap, aıyna 10 myń teńge berip turýǵa kelise me dep suradyq. Olar kelisti. Kelisimshart jasastyq", - deıdi kolej dırektory Kúnsulý Hýsaınova.
Sonymen birge, kolej dırektory ata-analardyń biri qarsy bolsa, stýdent aqyly bólimge aýystyrylatynyn túsindire ketti.
Al Valerıı Gamazov memlekettik tapsyrys somasyna pedagogtardyń eńbekaqysy, komýnaldyq qyzmet aqysy jáne ózge de shyǵyndar kiretinin aıtady. Bul qarajatta qarastyrylmaǵan jalǵyz shyǵyn - kúrdeli shyǵyndar, negizgi qurylǵylyrdy satyp alýǵa, ǵımaratty kúrdeli jóndeýden ótkizýge jáne taǵy basqalaryna jumsalady eken.
Taıaý ýaqytta Bilim basqarmasy kolej basshylyǵynyń áreketi qanshalyqty zańdy ekenine tekseris júrgizedi. Tekseris qorytyndysy boıynsha qajetti sharalar qoldanylady.
"Eger ata-analar aryzdansa, kolej kasasyna tólengen qarajattyń barlyǵyn qaıtarýy kerek bolady. Eger shaǵym bolmasa, qarjy kolejde qalady jáne bul qaıyrymdylyq retinde qabyldanady. Biraq muny toqtatatynymyz jáne alda boldyrmaıtynyz anyq", - deıdi Bilim basqarmasynyń ókili.
Sonymen qatar, oblys oratalyǵyndaǵy memlekettik tapsyrys alǵan jekemenshik kolejderge de tekseris júrgiziledi.
