Almaty ákimi Baýyrjan Baıbek Domınıkan Respýblıkasynyń syrtqy ister mınıstri Mıgel Oktavıo Vargas Maldonadomen kezdesti. Taraptar mádenıet, týrızm, ınvestısıa salalary boıynsha yntymaqtastyqty arttyrý máselelerin talqylady, dep habarlaıdy Qamshy aqparattyq agenttigi qala ákimdiginiń saıtyna silteme jasap.

Kezdesý barysynda Domınıkan Respýblıkasy SİM basshysynyń Qazaqstanǵa alǵashqy sapary eki el arasyndaǵy ózara baılanysty damytýǵa yqpal etetini aıtyldy. M.Vargas Astanadaǵy «EKSPO-2017» halyqralyq kórmesiniń joǵary deńgeıde ótetinin, oǵan Domınıkan Respýblıkasynyń da qatysatynyn sóz etti.

«Almaty qarjylyq óńir ortalyǵy, jeke kapıtal jáne saýda qalasy retinde tanymal, bizdiń delegasıa quramynda bankırler, óndirisshiler bar, naqtyly ınvestısıalyq jobalar týraly talqylaýǵa múmkindik jetkilikti», - dedi ol.

Domınıkan Respýblıkasy SİM-niń basshysy Almaty ákimin óz eline resmı saparmen kelýge shaqyrdy, bolashaqta Santo-Domıngo men Almatynyń baýyrlas qalalarǵa aınalatyndyǵyna jáne eki qala arasynda mádenı baılanystyń myqtap ornyǵatynyna senim bildirdi, «Smart sıtı» baǵdarlamasy aıasynda tájirbıe almasýǵa bolatyndyǵyn aıtty.

Kezdesý barysynda sheteldik delegasıaǵa Alataý aýdanyndaǵy ındýstrıaldy aımaqtyń, «Inovasıalyq tehnologıalar parki» AEA men ınvestorlarǵa bir tereze qaǵıdasy boıynsha qyzmet kórsetetin Ortalyqtyń áleýeti kórsetildi.

Sholýshy: Gúlim Jaqan