Qazaqstan-Qytaı kınofestıvali aıasynda jýrnalıserdiń suraqtaryna jaýap bergen akter Qazaqstanda qaıyrymdylyqpen aınalysqysy keletinin aıtty dep habarlaıdy Qamshy.kz
«Rasynda men osy salada jumys isteýge árdaıym daıynmyn. BAQ ókilderi arasyndaǵy dostarymnan meniń kómegim qajet bolýy múmkin problemalar jaıly kóbirek aıtýyn suraımyn. Sebebi men Qazaqstandy jaqsy bilmeımin jáne ondaǵy adamdarǵa ne qajet ekenin de bilmeımin. Ádette men qaıyrymdylyqpen aınalysqanda BAQ ókilderi maǵan meniń qandaı kómegim tıýi múmkin ekenin aıtady», - degen Djekı Chan.
Aty ańyzǵa aınalǵan akter Djekı Chan keshe Qazaqstanǵa ushyp kelgenin jazǵan edik. Djekı Chandy Astana ákimi Isekeshev pen Qazaqstan RTRK basshysy Erlan Qarın kútip alǵan.
Qytaı kınosy festıvaliniń ashylý saltanatyna Djekı Chan qonaqkáde retinde qytaı tilinde «Otan» ánin shyrqady. Akter bul án otanshyldyqqa baýlıtynyn, sondaı-aq, barlyq adam óz otanyn súıý kerek ekendigin jetkizdi. Aıta keteıik, Djekı Channyń án shashýynan keıin Qazaqstandyq ánshi Dımash Qudaıbergen sahnaǵa shyǵyp, «Singer» baıqaýynda shyrqaǵan qytaısha «Kúzgi muń» ánin aıtyp berdi.
Qytaılyq ári amerıkalyq akter Djekı Chan Dımash týraly da aıtqan. Dımashtyń áıgili kınoakter bolatyny týraly aıtqan ol «Dımash búkil qytaılyqtardy jáne meni ónerimen tánti etti» dep Dımashqa degen qurmetin bildirdi.
Ol búgin Qytaı kınosy festıvaliniń ashylý saltanatyna qatysar aldynda «Qazaqstan» Ulttyq telearnasynyń «Túngi Stýdıa» baǵdarlamasyna suhbat berdi.
Sonymen qatar áıgili akter qazaqstandyqtardy óziniń Beıjińde ashylǵan kýng-fý mektebinde dáris alýǵa shaqyrdy. Qazir Beıjińde kýng-fý boıynsha jattyǵýlar júrgizýdemiz, aldaǵy jyly onda mektebimizdi resmı túrde ashýǵa nıettimiz. Sondyqtan da osy múmkindikti paıdalana otyryp, osy ónerge qyzyǵýshylyq tanytqan adamdar Beıjińge kelip, kýng-fýdy meńgerýdi ótiner edim. Búginde osy saladaǵy jumystarymyz jańadan qarqyn alýda, osy oraıda bolashaqta barsha álemde mektepterdi ashýǵa nıettimin. Múmkin Qazaqstanda da kýng-fý mektebi ashylyp qalar», - dedi tanymal akter.
Sondaı-aq, Djekı Chan Qazaqstanǵa kelip, osynda kınematografıamen aınalysýdy armandaǵanyn da aıtty.
«10 jyl buryn Qazaqstannyń Gonkongtaǵy elshisi Qazaqstannyń baı resýrstary jaıly aıtyp bergen bolatyn. Bes jyl buryn elshi maǵan taǵy da Qazaqstan jaıly aıtyp berdi. Shynymdy aıtsam, Qazaqstanǵa kelip, osynda kınematografıamen aınalysýdy armandaıtynmyn. Biraq, amal ne, ýaqyttyń tyǵyz bolýyna baılanysty bul armanym sol kúıi oryndalmaǵan edi. Biraq men bolashaqta mindetti túrde Qazaqstanǵa kelip, osy ispen aınalysqym keledi», - dedi akter Astanada ótip jatqan Qazaqstan-Qytaı kınofestıvalinde.
Sondaı-aq, Djekı Chan Qazaqstan tabıǵatynyń oǵan áser qaldyrǵany sonshalyq - ol óziniń boevık janryndaǵy fılmderine ekshn qoıylymdar túsirip, búldirip alamyn ba dep qorqatynyn aıtty.
Aıta keteıik, 2017 jyldyń 7-18 maýsym aralyǵynda Astanada Qazaqstan-Qytaı kınofestıvali ótedi. Álemdik akter, kaskadór, kınorejısór, kınoprodúser, senarıst, ánshi, mıllıondaǵan kórermenniń súıiktisine aınalǵan ańyz adam - 63 jastaǵy Djekı Chan Qazaqstanǵa osy sharaǵa qatysý úshin kelip otyr. Elordalyqtar men qala qonaqtary festıvál aıasynda «İle ózeni», «Shynaıy mahabbat», «Gúlim», «Qaterli isik myrza, ketińiz», «Qasqyr totemi» syndy týyndylardy tamashalaı alady.
