ÚNDEÝ
Biz memleketimizdiń mereıin ústem etetin, mártebesin arttyryp, abyroıyn asqaqtata túsetin álemdik deńgeıdegi tarıhı is-sharanyń qarsańynda turmyz.
Barshańyzǵa belgili, elimizde 10 maýsymda EXPO-2017 halyqaralyq kórmesi bastalady. Osyǵan deıin Eýropadaǵy Qaýipsizdik jáne Yntymaqtastyq uıymynyń samıtin, Astana ekonomıkalyq forýmyn, Investısıalyq forým, Dúnıejúzilik ıslam ekonomıkalyq forýmyn, taǵy basqa halyqaralyq dárejedegi sharalardy joǵary deńgeıde uıymdastyrǵan memleketimiz EXPO-2017 kórmesin de abyroımen ótkizedi degen senimdemiz.
Álemniń barlyq memleketterinen mıllıonnan asa adamdy jınaıtyn osy aýqymdy joba bizdiń memleketimizdiń ekonomıkasyna jańa serpin beredi. Sondyqtan, osy is-sharany ótkizýge qolǵabys kórsetý, bizdiń el aldyndaǵy azamattyq boryshymyz bolyp tabylady.
Óıtkeni, bir jarym ǵasyrdan astam tarıhy bar EXPO-2017 halyqaralyq kórmesin joǵary deńgeıde uıymdastyrý túrli salada jumys isteıtin adamdarǵa úlken jaýapkershilik júkteıdi.
Elimizdiń tarıhynda altyn áriptermen jazylatyn aıtýly is-shara – halqymyzdyń dini men dástúrin, ádebıeti men mádenıetin, rýhanıaty men tarıhyn tanystyrýdyń, ulttyq qundylyqtarymyzdy kórsetýdiń, Qazaq eliniń jetken jetistigin álemge pash etýdiń mol múmkindigi.
Osy oraıda, Qazaqstan musylmandary dinı basqarmasy barsha otandastyrymyzdy shetelden kelgen qonaqtarǵa jyly shyraı tanytýǵa, olarmen jaqsy mámile ornatýǵa, qyzmet sapasyn arttyrýǵa, san ǵasyrlyq tarıhy bar halqymyzdyń ulttyq rýhanı murasy men ádet-ǵurpyn, sondaı-aq basty baılyǵymyz sanalǵan elimizdegi dinaralyq kelisim men ultaralyq birligimizdi kórsetý bolyp tabylady.
Paıǵambarymyz Muhammed (oǵan Allanyń salaýaty men sálemi bolsyn) óziniń hadıs-sharıfinde: «Bir eldiń basshysy (ókili) kelse oǵan laıyqty qurmet kórsetińder», – degen. Qonaqjaılylyq – qazaqy qasıet. Qazaqtyń qonaqjaılylyq, darhandyq, jomarttyq qasıeti – burynǵy kóshpeli ata-babalardan úzilmeı kele jatqan dástúr.
Alla Taǵala el ıgiligi jolyndaǵy bastamalarymyzdy, jaqsylyqqa jumyldyryp, ımandylyqqa uıytatyn izgi is-sharalarymyzdy berekeli etkeı! Jaratýshy Iemiz Táýelsizdigimizdi baıandy, egemen elimizdiń bolashaǵyn jarqyn, halqymyzdyń birligin bekem etkeı. Ámın!
