Qazaqstan prezıdenti Aqordada Qytaı prezıdenti Sı Szınpındi saltanatpen qabyldady dep habarlaıdy Qamshy tilshisi.
Saltanatty kezdesýde Elbasy Qytaı tóraǵasyna Elimizge 3-inshi ret saparmen kelip otyrǵany úshin alǵys bildirdi. Eki eldiń saýda-ekonomıkalyq qatynasy damyp jatqanyn basa aıtqan Elbasy Qytaı men Qazaqstannyń «kelise almaıtyn máselesi joq» ekenine erekshe toqtaldy.
Osy sátte «Samuryq-Qazyna» AQ men QHR Halyqaralyq saýdaǵa járdemdesý komıteti jáne «CITIC Group» korporasıasy uıymdastyrýynda Qazaqstan-Qytaı iskerlik keńesiniń tórtinshi otyrysy ótip jatyr.
Qytaı prezıdenti keshe keshqurym Astanaǵa kelgen bolatyn. QHR tóraǵasyn áýejaıdan QR Premer-Mınıstriniń orynbasary Asqar Mámın men QR Syrtqy ister mınıstri Qaırat Ábdirahmanov qarsy aldy.
Eske salsaq, bul eki el basshylarynyń sońǵy bir aıda ekinshi retki kezdesýi. Buǵan deıin Elbasy Qytaı tóraǵasymen mamyrdyń 14-inde Beıjińde ótken «Bir beldeý – bir jol» ekonomıkalyq forýmy aıasynda kezdesken edi.
Qytaı tóraǵasynyń elge kelýi qarsańynda 5 maýsymda Elbasy kitaphanasynda Sı Szınpınniń «El basqarý jóninde» kitabynyń qazaq tildi nusqasy tanystyrylǵan bolatyn. Sondaı-aq, 6 maýsymda Qazaqstan Respýblıkasynyń Tuńǵysh Prezıdenti Elbasy kitaphanasynda Nursultan Nazarbaevtyń qytaı tiline aýdarylǵan tańdamaly eńbekter jınaǵy tanystyryldy.
«El basqarý jóninde» – QKP OK bas hatshysy Sı Szınpınniń 2012 jyldyń 15 qarashasynan 2014 jyldyń 13 maýsymyna deıin kópshilik aldynda sóılegen 79 sózi, suhbaty, baıandamasy, oqyǵan dárisi, quttyqtaý hattary engen QHR tóraǵasynyń alǵashqy kitaby. Barlyq materıaldar 18 taraýǵa bólingen jáne hronologıalyq tártipte usynylǵan. Álemdik damýdyń kóshbasshysyna aınalǵan Qytaıdaǵy memlekettik reformalarǵa arnalǵan basylymǵa jer-jahan jurtshylyǵy tarapynan qyzyǵýshylyq artty. Búginde kitap álemniń 25 tiline (aǵylshyn, arab, ıspan, nemis, japon, káris, t.b.) aýdarylǵan.
Aıta ketetin bolsaq, 7-10 maýsymǵa josparlanǵan resmı sapary aıasynda Qytaı tóraǵasy EKSPO – 2017 ulttyq kórmeniń ashylý saltanatyna qatysady. Sondaı-aq, Shanhaı yntymaqtastyq uıymy elderi basshylary Astanada 8-9 maýsym kúnderi SHYU samıtin ótkizedi.
Elbasy samıt aldynda Shanhaı yntymaqtastyq uıymyna múshe memleketterdiń qorǵanys mınıstrlerin qabyldaǵan edi. Kezdesýge Qazaqstan Respýblıkasynyń Qorǵanys mınıstri S.Jasuzaqov, Qytaı Halyq Respýblıkasynyń Qorǵanys mınıstri Chan Vansúan, Reseı Federasıasynyń Qorǵanys mınıstri S.Shoıgý, Tájikstan Respýblıkasynyń Qorǵanys mınıstri M.Sheralı, Ózbekstan Respýblıkasynyń Qorǵanys mınıstri K.Berdıev, Qyrǵyz Respýblıkasy Bas shtabynyń bastyǵy R.Dýıshenbıev, Shanhaı yntymaqtastyq uıymynyń Bas hatshysy R.Alımov qatysqan.
Oǵan qosa Bishkekte SHYU elderi úkimet basshylarynyń kezdesýi ótti. Bishkekte ótken Shanhaı yntymaqtastyq uıymy úkimet basshylarynyń kezdesýinde saýda-ekonomıkalyq jáne ınvestısıalyq qatynasty damytýǵa baǵyttalǵan 12 qujatqa qol qoıyldy.
Shanhaı yntymaqtastyq uıymy (SHYU) 2001 j. Qazaqstan, Qyrǵyzstan, Qytaı, Reseı men Tájikstan basshylary Shekara aımaǵyndaǵy áskerı saladaǵy senim sharalaryn nyǵaıtý týraly kelisim (Shanhaı qalasy, 1996 j.) men Shekara aımaǵyndaǵy áskerı kúshterdi ózara qysqartý týraly kelisimge (Máskeý qalasy, 1997 j.) qol qoıǵannan keıin qalyptasqan «Shanhaı bestigi» tetiginiń negizinde quryldy.
