Búgin Shanhaı yntymaqtastyq uıymynyń samıtine qatysý úshin Astanaǵa Ózbekstan Respýblıkasynyń Prezıdenti Shavkat Mırzıeev keldi, dep habarlaıdy Qamshy aqparattyq agenttigi 24.kz-ke silteme jasap. 

Shavkat Mırzıeevtiń ushaǵy Astana áýejaıyna kelip qondy. Ózbekstannyń jańa Prezıdenti óz laýazymyna kiriskennen beri ekijaqty qarym-qatynasty belsendi damyta bastaǵanyn baıqaýǵa bolady. Kórshi eldiń basshysynyń naýryz aıynda Astanaǵa kelip, Elbasy Nursultan Nazarbaevpen kezdesýi sonyń aıqyn dáleli. Búgin Shavkat Mırzıeev Shanhaı yntymaqtastyq uıymynyń samıti men EHRO-2017 halyqaralyq kórmesiniń ashylýyna qatysady dep josparlanyp otyr.

Esterińizge salaıyq, byltyr aýqymdy shara Tashkent qalasynda ótken bolatyn. Shavkat Mırzıeev óz suhbatynda Qazaqstan Ózbekstannyń eń basty ekonomıkalyq áriptesteriniń biri ekendigin erekshe atap ótken. Qazir eki eldiń qarym-qatynastary jańa qarqynǵa ıe bolyp jatyr. Ózbekstanda qazaqstandyq kapıtaly bar 230 kásiporyn jumys isteıdi. Al bizde kórshi eldiń qatysýymen ashylǵan 130 kásiporyn bar eken. Bolashaqta qos memleket ózara taýar aınalymyn arttyrýdy kózdep otyr. Syrtqy saýda aınalymy 2005 jyldan 2013 jylǵa deıin 4 esege artyp, 2 mlrd dollardan asty. Al qazir bul kórsetkish 1,5 mlrd dollarǵa teń.

Esterińizge sala keteıin, bıyl Astanada Qazaqstan men Ózbekstannyń bıznes forýmy ótti. Bul aýqymdy shara barysynda taraptar somasy 840 mln dollardy quraıtyn 91 kelisimshartqa qol qoıyldy. Eki eldiń prezıdentteri kezdeskennen keıin 2020 jylǵa deıin taýar aınalymyn 5 mlrd dollarǵa deıin arttyrýdy tapsyrdy. Qazir biz Ózbekstanǵa hımıalyq ónimderdi eksporttaıtyn boldyq. Al kórshi elden bizge jemis-kókónister eksporty birshama artty. Árıne, baýyrlas, kórshiles halyqtar arasyndaǵy tarıhı dostyqtyń tamyry tereńde ekendigin de aıta ketken jón.

Sholýshy: Aıgerim TAÝBAI