«EKSPO» kórmesi resmı túrde ashyldy, dep habarlaıdy Qamshy aqparattyq agenttigi.
Kórmeniń ashylýyna Astanaǵa QHR tóraǵasy Sı Szınpın, Aýǵanstan prezıdenti Ashraf Ǵanı Ahmadzaı, Ózbekstan memleket basshysy Shavkat Mırzıóev, Qyrǵyzstan prezıdenti Almazbek Atambaev, Tájikstan prezıdenti Emomalı Rahmon, Belarýs prezıdenti Aleksandr Lýkashenko, Chehıa prezıdenti Mılosh Zeman, Pákistannyń memleket basshysy Mamnýn Hýseın, Mońǵolıa prezıdenti Sahıagıın Elbegdorj, Ispanıa koróli Fılıpp IV, Úndistan men Lúksembýrg premer-mınıstrleri — Narendra Modı men Ksave Bettel, sondaı-aq BUU Bas hatshysy Antonıý Gýterrısh keldi.
Saltanatty rásimde sóz sóılegen Nursultan Nazarbaev barsha jurtty Astanada halyqaralyq «EKSPO-2017» mamandandyrylǵan kórmesiniń ashylýymen quttyqtady.
Elbasy 115 memleket pen 22 halyqaralyq uıym qatysqan EKSPO kórmesin Qazaqstannyń TMD jáne Shyǵys Eýropa elderi arasynan birinshi bolyp ótkizip otyrǵanyn atap ótti.
– Bizdiń ótinishimizdi jáne usynǵan taqyrybymyzdy qabyl alǵandary úshin barlyq elderge rızashylyǵymdy bildiremin. Osyndaı aýqymdaǵy kórme – bir memlekettiń ǵana atqarǵan isi emes, bul – osynda óz jetistikterin kórsetýge kelgen halyqaralyq qoǵamdastyqtyń eńbegi. Astanadaǵy EKSPO halyqaralyq kórmesi – jahandyq keńistikte elimizdi tanytýdyń jáne «Qazaqstan» ulttyq brendin ilgeriletýdiń jańa belesi. Biz «Bolashaqtyń energıasy» taqyrybyn usyna otyryp, ǵylymı progrestiń bel ortasynda bolýdy qalaımyz, – dedi Nursultan Nazarbaev.
Memleket basshysy osydan bir jarym ǵasyr buryn Londonda ótken alǵashqy dúnıe júzilik kórmeden keıin adamzat orasan zor tehnologıalyq ózgeristerdi bastan ótkergenine toqtalyp, búginde tıimdi jáne qaýipsiz energıa salasyndaǵy tyń jańalyqtar qarsańynda turǵanymyzdy atap ótti. Qazaqstan Prezıdenti «EKSPO-2017» kórmesi osy jahandyq úderiske óziniń aıryqsha úles qosatynyna senim bildirdi.
– Zamanymyzdyń ozyq oıly adamdarynyń qatysýy josparlanǵan is-sharalar adamzat damýynyń jańa baǵyttaryn aıshyqtaıdy. Mıllıondaǵan qazaqstandyqtar men dúnıe júziniń túkpir-túkpirinen keletin júz myńdaǵan qonaq álemdik ǵylymı jáne ınjenerlik aqyl-oıdyń keremet jetistikterimen tanysatyn bolady. EKSPO baǵdarlamasynda 6 myń túrli is-shara ótkizý josparlanǵan. Olar álem elderi arasyndaǵy ózara túsinistikti damytýǵa, ǵylym, bıznes jáne qoǵam arasyndaǵy tabysty is-qımylǵa, sondaı-aq Qazaqstan mádenıetimen tanysýǵa septigin tıgizedi. Biz kelýge tilek bildirgenderdiń barlyǵyn elimizdiń basqa da óńirlerin aralap kórýge, biregeı tabıǵatymyzben jáne tarıhı muramyzben tanysýǵa shaqyramyz, – dedi Nursultan Nazarbaev.
Memleket basshysy álemniń ekologıalyq turǵydan teńdes jáne ornyqty damýynyń mańyzdylyǵyna toqtalyp, «EKSPO-2017» taqyrybynyń bizdiń elimiz úshin ózekti ekenine erekshe nazar aýdardy.
– Qazaqstan orasan zor kómirsýtek qorynyń bar ekenine qaramastan, jańartylatyn energıa kózderine belsendi túrde kóshetin bolady. Osyndaı maqsat bizdiń «Strategıa-2050» baǵdarlamamyzda jáne «Jasyl ekonomıkaǵa» kóshý jónindegi tujyrymdamamyzda kórinis tapty. Qazaqstan 2050 jylǵa qaraı jańartylatyn kózderdiń esebinen elektr energetıkasynyń jalpy kóleminiń jartysyn óndire alatyn bolady. Sonymen birge ekonomıkada energıanyń jumsalýy da azaıady, – dedi Qazaqstan Prezıdenti.
Nursultan Nazarbaev «Astana EKSPO-2017» kórme kesheniniń nysandary men halyqaralyq pavılondardyń qalaı paıdalanylatyny jóninde aıtyp berdi.
– Kórmeni aralaýshylar nazaryna basty nysan – jer sharyn beıneleıtin «Nur Álem» sferasy usynylady. Onyń ár deńgeıi energıanyń belgili bir túrine arnalǵan. Sferanyń ózeginde bizdiń Ulttyq pavılon ornalasqan. Onda qazaqstandyq ǵalymdardyń eń ozyq jobalary kórsetilgen Qazaqstanmen tanysý aımaǵy jáne «Jasampaz energıa» aımaǵy bar. EKSPO kórmesine memleketter men halyqaralyq uıymdardyń 130-dan astam ekspozısıalary ákelindi. Eki taqyryptyq pavılonda energetıkanyń evolúsıasy, onyń HHİ ǵasyrdaǵy problemalary jáne osy saladaǵy tehnologıalyq órleý sáti kórsetiledi, – dedi Memleket basshysy.
Qazaqstan Prezıdenti kórmeniń iskerlik baǵdarlamasyna toqtaldy. Onyń aıasynda Astana ekonomıkalyq forýmy, Shetel ınvestorlarynyń keńesi, Islam yntymaqtastyǵy uıymynyń samıti sıaqty birqatar iri halyqaralyq is-sharalar ótkizý josparlanǵan.
Memleket basshysy kórmeniń halyqaralyq ózara yntymaqtastyqqa eleýli tyń serpin berip, elimizdiń ǵylymyn damytýǵa jáne ekonomıkamyzdy jańǵyrtýǵa septigin tıgizetinine senim bildirdi.
Nursultan Nazarbaev «EKSPO-2017» kórmesi aıaqtalǵan soń onyń ınfraqurylymy odan ári paıdalanylatyny týraly aıtty.
– Bul jerde «Astana» halyqaralyq qarjy ortalyǵy jumys isteıtin bolady. «Jasyl» tehnologıalar men ınvestısıalardy damytý jónindegi halyqaralyq ortalyq qurylady. İT-startaptardyń halyqaralyq tehnoparki ashylady. Osylaısha, elimizdiń, óńirimizdiń jáne álemniń ıgiligi úshin EKSPO-daǵy «ınovasıanyń tamyr soǵysy» jalǵasatyn bolady, – dedi Qazaqstan Prezıdenti.
Sońynda Memleket basshysy «EKSPO-2017» kórmesin daıyndaý úderisine qatysýshylardyń barlyǵyna shynaıy qoldaý kórsetkenderi jáne kórme ıdeıasyn júzege asyrýǵa atsalysqandary úshin alǵys aıtty.
– Bizdiń mártebeli qonaqtarymyzǵa – Astanadaǵy «EKSPO-2017» kórmesiniń ashylý saltanatyna qatysýǵa ýaqyt taýyp kelgen memleketter men úkimetter basshylaryna erekshe rızashylyq bildiremin, – dedi Nursultan Nazarbaev.
