Oralda otarshyldyq ezgige qarsy kúresken batyr, áıgili sheshen Syrym Datulynyń 275 jyldyǵyna arnalǵan «Aıbyndy jigitter-2017» atty aımaqtyq baıqaý márege jetti, dep habarlaıdy Qamshy aqparattyq agenttigi 24.kz-ke silteme jasap.
Maqsat – qol bastaǵan kósem, sóz bastaǵan sheshen Syrym batyrdyń esimin ulyqtaý arqyly el ishindegi segiz qyrly, bir syrly, ónerli jastardy anyqtaý. Baıqaýǵa Aqtóbe, Qyzylorda jáne Batys Qazaqstan oblysynyń aýdandarynan kelgen 19 ben 29 jas aralyǵyndaǵy 12 úmitker qatysty. Baıqaýdyń birinshi kúni. Saıyskerler aldymen sadaqpen nysana kózdeý arqyly óz rettik nómirlerin anyqtady. Jigitterdiń bilek kúshi ulttyq oıyndar arqyly synaldy. Aýdaryspaq – kúsh-jigermen qosa asqan eptilikti talap etetin sport túri. Sondyqtan bolar, úmitkerlerdiń bul kezeńge myqtap daıyndalǵany baıqaldy.
Oljas Tasbergen, baıqaýǵa qatysýshy: - Arnaıy osy sharaǵa baılanysty Qyzylorda oblysynda aýdaryspaqqa daıyndaldym. Oral qalasyna jeńemin degen úmitpen, jalyndaǵan jigermen kelip otyrǵan jaǵdaıym bar.
Baıqaýdyń ekinshi kúni. Otarshyldyqqa qarsy kúreste dana da dara, kósem de sheshen, batyr da bı retinde tanylǵan Syrym Datuly izbasarlarynyń sahna tórinde synalǵan shaǵy. «Tegimdi meniń surasań» týrynda úmitkerler ózderin kórermenge ártúrli qyrynan tanystyrýǵa tyrysty. «Eskirmeıtin esti sóz» syny saıyskerlerdiń batyrdyń sheshendik ónerimen qanshalyqty tanys ekendigin anyqtap berdi.
Ánýar Mustafın, baıqaý júldegeri, Aqtóbe oblysy: - Syrymdaı dana babamyz – tilge sheshen, batyr. Aıtysymyz bar, osy aıtys arqyly balalar sheshendigin tanytady. Medhat Qambetov, oblystyq halyq shyǵarmashylyǵy ortalyǵynyń dırektory: - Baıqaýdyń maqsaty – egemendigimizdiń arqasynda salt-dástúrlerimiz nemese jigitterdiń jigittigin kórsetetin ulttyq oıyndardyń sheberligin baıqaý. Sahna sheberligi osy jerde tarazyǵa túsedi.
Baıqaýdyń tórtinshi, ıaǵnı sońǵy kezeńi «tas shaınap, qum túkirgen» dep ataldy. Munda saıyskerlerge qandaı da bir ónerimen kórermendi tańǵaldyrý mindeti qoıyldy. Nátıjesinde Jubanysh Túımeshov, Ánýar Mustafın men Dosjan Úmbetovtar úzdikter sapynan kórindi. Al bilek kúshimen qosa sheshendigimen daralanǵan Zelenov aýdanynyń ókili Aqtilek Sársenovty qazylar baıqaý jeńimpazy dep tanydy.
Sholýshy: Aıgerim Taýbaı
