Almaty qalasynda Qazaq-qytaı mádenı baılanysy men «2017 Qazaqstandaǵy qytaı kıno festıvali» aıasynda Shyńjań kıno aptalyǵynyń tusaýkeseri ótti dep habarlaıdy Qamshy tilshisi.
Kıno aptalyǵyn tusaý keserine Qytaı ortalyq televızıasy basshysy Nı Chensı, Almatydaǵy Qytaı konsýldyǵynyń basshysy Jań Veı, «Qazaqfılm» kınostýdıasynyń sarapshylar keńesiniń tóraǵasy Bekbolat Shekerov, Almaty máslıhatynyń hatshysy Qaldybaı Qazanbaev jáne Qazaqstannyń halyq ártisi Asanáli Áshimov qatysty. Ashylý saltanatynda sóz sóılegen qonaqtar eki eldiń mádenı baılanysy jandanyp kele jatqanyna erekshe toqtaldy.
Ashylý saltanatyna kelgen qonaqtarǵa Aryslan Abdýkerımniń «Aqshanyń álegi» fılmi qoıyldy.
Kıno aptalyq QHR Baspasóz, baspa, radıo, kıno jáne televızıa isi jónindegi memlekettik basqarmasy, Qazaqstandaǵy QHR Elshiligi, QR Mádenıet jáne sport mınıstrliginiń qoldaýymen 10 -25 maýsym kúnderi ótedi
«Shyńjań kıno aptalyǵy «2017 Qazaqstandaǵy qytaı kıno festıvali» aıasynda ótetin mádenı sharalarynyń biri retinde Qytaı jáne Qazaqstan tarapynan jan-jaqty qoldaý taýyp, Qazaqstan men QHR Shyńjań kıno salasyndaǵy tájirıbe almasý men mádenı yntymaqtastyǵynyń alańyna aınaldy. Sonymen qatar, munyń Qazaqstan kórermenderiniń Qytaıdy, tipti Shyńjań kıno ónerin jaqynyraq tanýyna aıtarlyqtaı járdemi bolmaq.
Eki aptaǵa jalǵasatyn «Shyńjań kıno aptalyǵy» sheńberinde Almaty qalasynyń «Kınopark», «Arman» tárizdi 5 kınoteatrynda ár alýan taqyryptaǵy jáne qoıý ulttyq erekshelikke ıe kıno týyndylar kórsetiletin bolady.
«Shyńjań kıno aptalyǵy» aıasynda oqıǵalary shynaıy ómirden alynyp, sheksiz mahabbatty jyrlaıtyn «Shynaıy mahabbat» fılmi, aqyndyqty asqaq murat tutqan qazaq qyzynyń aıtys ónerin órge súırer sulý jan-dúnıesi sýrettelgen «Gúlbıke» fılmi, Shyńjań jasóspirimderiniń jastyq rýhyn jigerlendirýge baǵyttalǵan «Arman asýy» fılmi, jáne aqsha, adamı qasıet, otbasy, mahabbat jáne dostyq taqyrybyndaǵy «Aqshanyń álegi» atty komedıalyq fılm sekildi tyń týyndylar kórermender nazaryna usynylady.
