Qazaqstan Respýblıkasy Investısıalar jáne Damý mınıstriligi saıtyndaǵy aqparat boıynsha, QR Úkimeti janyndaǵy Respýblıkalyq onomastıkalyq komısıanyń 2016 jyldyń 1 qarashasynda ótken kezekti otyrysynda Qazaqstandaǵy temirjol stansıalarynyń ataýyn qaraý máselesi kóterilip, onda komısıa músheleriniń sheshimimen 90 stansıanyń ataýy jańartylǵany týraly jazylǵan edi. Biraq sol ataýlar áli jańartylmaǵan sıaqty. Áleýmettik jelide poıyz bıletterinde qala attary men beket attarynyń, adam attarynyń oryssha jazylýyna narazylyq bar.
Jańartylmaǵan bılettegi tańbalar ǵana emes. Rýhanı jańǵyryp jatyrmyz, EXPO-myzdyń taqyryby da energıalyq jańǵyrý. Alaıda táýelsizdik alǵanymyzǵa shırek ǵasyrdan assa da sanamyz jańǵyra almaı jatyr. Nege olaı taýsylamyz? Sebebi Qazaqstanda kólik qatynasyna tıesili ataýlar áli jańalanbaǵanymen qoımaı, jańa qosylǵan poıyz ataýlaryn da sovettik sarqynshaq esimmen ataıdy ekenbiz.
Qazaqstan arnasynyń Basty aqparat baǵdarlamasy júrgizýshisi osyǵan baılanysty áleýmettik jelide másele kóterdi.
«EKSPO-2017 kórmesiniń ótkizilýine oraı qosymsha poıyzdar ashylypty. Sonyń biri Tarazdan Astanaǵa qatynaıtyn poıyzdy 239/240-shy "Djambýl-Astana" dep atapty. Táýelsizdik alǵan alǵashy jyldar-aq túzetilgen, 20 jyldan beri umytyla bastaǵan bul ataýdy "Jolaýshylar tasymaly" AQ qandaı maqsatpen "jańǵyrtyp" otyr? "Kompúter qazaq áripterin tanymaıdy" degen baıaǵy syltaýlar endi aıtylmaıtyn shyǵar. Endeshe, qandaı sebep bolýy múmkin???», - dep saýal tastady Danıar Menılbekov.
Temir jol, áýe tasymaly salasyndaǵy olqylyq bir ol emes. Áleýmettik jelide Almaty-Astana arasyndaǵy kólik tasymaly baǵasynyń ósýine narazylyq kóp. Bılettiń jetispeýshiligi úlken problemaǵa aınalǵan.
Bolashaq respýblıkalyq qozǵalysy jetekshisi Dáýren Babamuratov osyǵan baılanysty áleýmettik jelide post jazdy.
«Bári de túsnikti. EKSPO-nyń keremet ashylýymen bárińizdi quttyqtaımyn. Biraq suraýym bar, EKSPO-ǵa 1,5 mıllıon shamasynda bılet satyldy. Kóptegen bıletti basqa qalalardyń turǵyndary satyp alǵany belgili. Alaıda poıyz bıletteri bir aı buryn jetispeı jatsa, ushaq úsh qonyp jetse, trassanyń qorqynyshty jaǵdaıy bolsa belgili, biz Astanaǵa qalaı jetemiz? Áli de kesh emes, qosymsha poıyzdar men ushaqtar shyǵaryńyzdar», - dep jazdy Babamuratov tıisti mekemelerdi belgilep.
EXPO dep entikkenderdiń EKSPO ótkende «týrıserdiń aqshasyna qaryq bolasyńdar» dep kele jatqanyna biraz jyl boldy. Qara halyq sol EKSPO-ǵa baryp qaltasyndaǵy qarajatyn tógip bermese, ýystap alyp ketpeıtini belgili. Kerisinshe ýystap aqsha tabatyn áne sol «Qazaqstan temir joly», «Air Astana» sıaqty alpaýyt kompanıalar. Alaıda olardyń halyqtyń yńǵaıyna jyǵylatyn, memlekettiń tilin, turǵyndaryn qurmetteıtin oıy kórinbeıdi.
Aqan Bektas
