2017 jyldyń 9 maýsymy qazaq eli úshin tarıhı sátke tolyqty. Qazaqstandy ózge qyrynan tanytatyn, bar álemge elimizdi moıyndatatyn «EKSPO-2017» halyqaralyq kórmesi Astana qalasynda dál osy kúni ashyldy. 2017 jyldyń 10 maýsymy men 10 qyrkúıegi aralyǵynda ótetin kórmeniń basty taqyryby – «Bolashaq qýaty» («Future Energy»).
Kórmede álemniń úzdik tehnologıalary men tájirıbesi, balamaly energıa kózderin paıdalaný salasyndaǵy jetistikter pash etiledi. Kórmeni tamshalaýǵa sheteldik qonaqtardyń sanynda shek joq. 115 memleket, onyń ishinde AQSH, Qytaı, Ulybrıtanıa, Fransıa, Germanıa, Reseı, Japonıa, Ońtústik Koreıa sekildi elder bar, sondaı-aq 22 halyqaralyq uıym EKSPO-2017 kórmege qatysatynyn resmı túrde rastaǵan.
Sheteldik qonaqtardyń maqsaty – ózge elde ótetin kórmeniń uıymdastyrylý dárejesin baǵamdaý. Olardyń kórmede júrýi Qazaqstan úshin asa qoldaý tanyta qoımas. Al óz elimizdiń azamattary elimizde ótken kez-kelgen is-sharaǵa atsalysyp, qoldaý tanytyp jatsa, el úshin ǵanıbet degen sol emes pe?
Sondaı azamattyń biri Qytaı Halyq Respýblıkasynyń týmasy, búginde Óskemen qalasynyń turǵyny Ǵalymjan Toqtaruly. 29 jastaǵy Qazaqstan azamaty kórmege atsalysý maqsatynda Óskemen qalasynan Astanaǵa deıin júgirip jetken.
«Meniń basty maqsatym – halyqty EKSPO kórmesine shaqyrý, kórmeni jarnamalaý», - dedi er azamat Qamshy aqparattyq agenttiginiń tilshisine aıtqan sózinde.
Ǵalymjan Toqtarulynyń sapary 26 maýsymda bastalǵan, 9 maýsym kúni Qoıandy aýylyna taıap, 10 maýysmda dittegen jerine jetken. 16 kúngi saparynda kúnine 80 shaqyrym joldy júgirip ótken. Kórmege asa qyzyǵýshylyq tanytqan qazaq azamatyna 1000 shaqyrymnan astam uzaq sapardy ótkerý ońaıǵa soqpaǵany aıdan anyq, biraq kózdegen maqsatyn qalaı da júzege asyrǵan ol búginde kópke arman bolǵan kórmeni aralap júr.
Óskemen qalasynyń turǵyny sol aımaqta bilim alyp, sol qaladaǵy Halyqqa qyzmet kórsetý ortalyǵynda ınspektor bolyp qyzmet atqarǵan, qazirgi ýaqytta jumyssyz. Alaıda jumyssyz bolsa da, ýaqytyn óz maqsatyna jetý úshin paıdalanǵan er adam kórmeni tamashalaý úshin jolyna ketken qarjyny óz qaltasynan shyǵarǵan.
Erlan TÓLEÝBAI
