Kıevten Astanaǵa qoldan tigilgen 30 metrlik oramal ákelindi, dep jazady Qamshy aqparattyq agenttigi. Rekordty uzyndyqtaǵy shálini mamandar arnaıy «EKSPO» kezinde ótetin Ulttyq kún úshin daıyndapty. Sonymen qatar bul sharaǵa ýkraınalyq qonaqtardyń alǵashqy legi de kele bastady. Bul týraly 24.kz habarlaıdy.
Ýkraınada álemdegi eń uzyn oramal jasaldy. Oǵan 20 keli jip, 30 metr mata paıdalanylǵan. Sheberler kesteli oramaldy tigýge eki apta ýaqyt jumsaǵan. Alaıda olar óz týyndylaryn rekordtar kitabyna engizip úlgergen joq. Sebebi «EKSPO-2017» kórmesi aıasynda ótetin Ýkraına Ulttyq kúnderinde eń uzyn oıýly matany jurtshylyq nazaryna usynýǵa asyqqan.
Oksana Dıkaıa men onyń áriptesterine 20 metrlik kesteli oramaldy jasaý ońaıǵa soqqan joq. «EKSPO-ǵa» úlgerý úshin tynymsyz eńbek etti. Ásirese sımmetrıkalyq oıýlaryn tigý biraz ýaqyt alǵan.
Oksana Dıkaıa, Bogdan Hmelnıskıı fabrıkasynyń sheberi:
- Bizdiń sheberler ýaqytpen sanaspaı jumys istedi. Olar oramaldy bıiktikten kórinetindeı aýqymdy jáne dástúrli boıaý – qyzyl, qara tústerdiń qanyqty bolýyna asa mán berdi.
Astanada ótetin «EKSPO-2017-de» ýkraınalyqtar qolóner týyndylaryn ǵana emes, ulttyq ónerin de kópshilik nazaryna usynady.
Vladımır Djıdjora, Ýkraınanyń Qazaqstan Respýblıkasyndaǵy ýaqytsha senimdi ókili:
- «EKSPO-2017» kórmesinde ótetin bizdiń Ulttyq kúnimiz esten ketpes sátterge toly bolmaq jáne qonaqtarǵa kóterińki kóńil-kúı syılaımyz.
«Ulttyq kúnge qatysý ár ýkraınalyq úshin úlken qurmet», – deıdi kásipkerlik klýbtyń basshysy Tatána Lúlka.
Ýkraınadan kelgen alǵashqy delegasıanyń quramy 15 adamnan turady. Jazǵy maýsymda kem degende taǵy eki topty «EKSPO-ǵa» alyp kelýdi maqsat tutyp otyr.
Tatána Lúlka, Community jýrnalynyń shef-redaktory:
- Bul kórmeni tamashalaıtyn jurt kelesi 15-20 jylda balamaly energıa salasyn damytady. Bir-birimen osy saladaǵy jetistiktermen bólisip, ınvestısıa salý múmkindikterimen tanysýǵa naǵyz taptyrmas alań.
Aldyn ala esepter boıynsha, «EKSPO-2017» kórmesine eki myńnan astam ýkraınalyq qonaqqa keledi. Alaıda alǵashqy delegasıa kelip qaıtqannan keıin, olardyń qatary eselep artýy múmkin.
Sholýshy: Gúlim Jaqan
