Óıtkeni ras, óziń de jelidesiń, 
Erkelermen esirip erigesiń. 
Boıdaqpyn dep, jar izdep júrgendeı bir, 
Bolsa deısiń jas qyzdan kóńildesiń.

Qatynym sezbesin dep úndemeısiń, 
Qaıdan keldiń, kimmen dep,termemeısin. 
Óz kináńdi jaryńnan jasyram dep, 
Jubaıyńdy tekserip úlgermeısiń.

Áleýmettik jeliler kóbeıýde, 
Kúnnen kúnge san túri kórkeıýde. 
Jalańashtyq jahandy jaýlap alyp, 
Jas urpaqtyń sanasyn ıgerýde.

Jan dosyńnyń jaryna kóz salasyń, 
Netken sulý, kórkem dep tamsanasyń. 
Qudaı qosqan qosaǵyń umyt bolar, 
Ózge jannyń qushaǵyn ańsaǵasyn.

Tárbıe tálim alyp ózge elden, 
Aýrýǵa da shaldyqtyq lezde kelgen. 
Balamyz ǵalamtorda ne kóredi dep, 
Qaramaımyz, qorǵashtap ersi jelden.

Kókeıde bir suraq bar jaýaby joq, 
Kóbeıýde erlerim saýaby joq. 
Saýna kezgen seriler kesirinen, 
Jetimderdiń kóz jasy jaýady kóp.

Jarasa ma, aıtýǵa jigit desek, 
Ańdyǵany ósek pen, bolsa tósek. 
Bir ananyń órimdeı jas shybyǵyn, 
Aldap arbap, kóndirse keýde tósep.

Eı, pende, qumarlyqty qoımadyń ba? 
Saýyqqa saıran salar toımadyń ba? 
Jas qyzdyń ar namysyn qorlaǵanda, 
Anańdy, qaryndasty oıladyń ba?

Ýa jaratqan, táńirim, rabbym Alla, 
Tánimdi múgedek qyl, bárin jalma. 
Tek qana basymdy ıip ótinerim, 
Júrekten ımanymdy sýyryp alma.

Bozdasa keýdemdegi bota muńym,
Qul bolǵan qajytady soqa kúnim.
Kedeılerdi qýdalap baı shalqysań,
Eshqashan ápermeıdi opa munyń.
Aıyna 360 myń dollarlap,
Aılyq alǵan betsizi joǵarynyń.
Bireýi Afrıkada ań aýlap júr,
Ormanyn otap bolyp otanynyń.
Baqshasyna Brazılıanyń talyn eged,
Aqshasyna aýyldyń shopanynyń.
Bireýi bir aýyldyń jyl búdjetin,
Shashady shýbasyna toqalynyń.
Apyr-aı bular qashan toqtatady?
Elimniń qazynasyn qoparýyn.
Osyndaı opasyzdardy oınaqtatyp,
Sen qaıda qarap tursyń, O Táńirim?!
Jasaǵan bolashaqqa joryq dep pe em?
Oıymdy ótem búgin bólip kóppen.
Qazaqtyń tarıhynda aqyndar kóp,
Eline mańdaı terin senip tókken.
Keshegi Buqar Jyraý dara dana,
Ár sózin Abylaıǵa erikti etken.
Bar jaıdy bilgennen soń ǵana bulaı,
Yrysyn Qazaǵymnyń tolyqty etken.
Áý bastan hanǵa aıtylǵan shyndyq qana,
Basshynyń árbir isin kórikti etken.
Búgingi zıalynyń túrin kórseń,
Shetinen ózin oılap shógip ketken.
Basshylyq suraı qalsa búlk etpesten,
Jaǵdaıy deıdi jurttyń ońyp ketken.
Aqyly jetkenimen batyly joq,
Salqyny saıasattyń soǵyp ketken.
Imany jurtta qalǵan aǵalardyń,
Mılary metalolom bolyp ketken.
Qazaqtyń az boldy ma zor uldary?
Uqqanǵa shyn ulaǵat sonyń bári.
Tóle bı, Qazybekpen Áıtekeler,
Paryzyn parasatpen oryndaday.
Kesip aıtqan ımandylyq arqasynda,
Tarıhtyń tur ǵoı áne tórinde áli.
Al búgingi bı degen depýtat qoı,
Maǵynasyn uǵynsa onyń daǵy.
Burynǵylar halyqqa jol kórsetetin,
Búgingiler tappaı júr óz jolyn da áli.
Búgingiler bı de emes bıshi de emes,
Bıshik bop tur bıliktiń qolyndaǵy.

Rınat Zaıtov