Qazaqstannyń memlekettik teatrlary repertýaryn tolyqtyryp, jańa qoıylymdardy kórermen nazaryna usynyp keledi. Bıylǵy teatr maýsymynda elimizdiń sahnalarynda drama, opera, balet, mýzykalyq komedıa, balalar men jasóspirimderge arnalǵan spektáklderdi qamtyǵan júzdegen premera ótti.
Memleket basshysy Qasym-Jomart Toqaev mádenıet pen ónerdi damytýǵa, ulttyq bolmysty nyǵaıtýǵa jáne shyǵarmashylyq ujymdardy qoldaýǵa basymdyq beredi. Sonyń nátıjesinde Maksım Gorkıı atyndaǵy Memlekettik akademıalyq orys drama teatryna «Ulttyq» mártebe berý, al Soltústik Qazaqstan oblystyq Sábıt Muqanov atyndaǵy qazaq sazdy-drama teatryna «Akademıalyq» mártebe berý jóninde sheshim qabyldandy.
Teatrlardyń mártebesin arttyrýmen qatar, mádenı ınfraqurylymdy jańǵyrtý jumystary da jalǵasyp jatyr. Atap aıtqanda, Muhtar Áýezov atyndaǵy Qazaq ulttyq drama teatry men Natalıa Sas atyndaǵy orys memlekettik akademıalyq balalar men jasóspirimder teatry ǵımarattaryn qaıta jańǵyrtý jumystary júrgizilýde.
Búginde elimizde opera, balet, drama, mýzykalyq komedıa, qýyrshaq, balalar jáne jasóspirimder teatrlaryn qosa alǵanda, túrli baǵyttaǵy 59 memlekettik teatr jumys isteıdi. Teatr salasynda 8,1 myńnan astam adam eńbek etedi.
Maýsym bastalǵaly memlekettik teatrlarda 16 myńnan astam spektákl men mádenı baǵdarlama kórsetildi. Olardy 2 832 835 kórermen tamashalady. 410 jańa qoıylym men baǵdarlama sahnalandy.
Maýsymnyń eleýli premeralary qatarynda «Astana Opera» teatryndaǵy «Qypshaq qyzy Appaq» operasy, Abaı atyndaǵy Qazaq ulttyq opera jáne balet teatryndaǵy «Han Sultan. Altyn Orda» operasy, sondaı-aq «Astana Balet» teatryndaǵy «Carmina Burana» baleti men «Qarlyǵash», «Bolero H» horeografıalyq mınıatúralary bar.
Jańa qoıylymdar drama jáne mýzykalyq komedıa teatrlarynda da sahnalandy. Ǵabıt Músirepov atyndaǵy Memlekettik akademıalyq balalar men jasóspirimder teatrynda «Gamlet» pen «Qorǵansyz» spektáklderiniń premerasy ótti. Quddys Qojamıarov atyndaǵy Respýblıkalyq memlekettik akademıalyq uıǵyr mýzykalyq komedıa teatrynda «Revızor», Mıhaıl Lermontov atyndaǵy Ulttyq orys drama teatrynda «Jenıtba», al Respýblıkalyq memlekettik akademıalyq koreı mýzykalyq komedıa teatrynda «Mahabbat bárin jeńedi» qoıylymdary kórermenge jol tartty.
Maýsym aıaqtalǵanǵa deıin de birqatar jańa premera usynylady. 26 maýsymda «Astana Balet» teatry «Altyn gúl» baletin sahnalasa, 27 maýsymda Qalıbek Qýanyshbaev atyndaǵy Qazaq ulttyq mýzykalyq drama teatrynda Ábdijámil Nurpeıisovtiń shyǵarmasy negizinde qoıylǵan «Qan men ter» spektakliniń premerasy ótedi.
