Qazaqstan Respýblıkasy İshki ister mınıstrligi óskeleń urpaqty patrıottyq rýhta tárbıeleýge, olardyń quqyqtyq mádenıetin qalyptastyrýǵa, azamattyq jaýapkershiligin arttyrýǵa jáne zańǵa qurmet sezimin nyǵaıtýǵa baǵyttalǵan "Jas saqshy" polısıa synyptaryn damytý boıynsha júıeli jumysty jalǵastyrýda, - dep habarlaıdy Polisia.kz. Búginde elimiz boıynsha 267 "Jas saqshy" synyby bar. Onda bes myńnan astam oqýshy bilim alady. Bul joba qoǵamdyq qaýipsizdik máselesine nazar aýdaryp, elge qyzmet etýge jáne quqyq qorǵaý salasyna qyzyǵýshylyq tanytatyn belsendi jastardy bir ortada biriktiredi. Polısıa synyptaryndaǵy oqý úderisi oqýshylardyń kóshbasshylyq qasıetterin, tártibin, memlekettik rámizder men ulttyq qundylyqtarǵa degen qurmetin damytýǵa yqpal etip, el bolashaǵyna jaýapkershilikpen qaraýǵa úıretedi. Quqyq buzýshylyqtardyń aldyn alýǵa, zańǵa baǵynatyn minez-qulyqty tárbıeleýge jáne jastar arasynda polıseı mamandyǵyn nasıhattaýǵa erekshe nazar aýdarylady. 2025-2026 oqý jylynda jalpy sany 52 oqýshydan turatyn úsh "Jas saqshy" synybynyń túlekteri mektep bitirdi. Olar endi İshki ister mınıstrliginiń vedimistik joǵary oqý oryndarynda bilim alýǵa nıetti. Bul joba ishki ister organdary úshin kadrlyq rezerv qalyptastyrýda óziniń joǵary tıimdiligin kórsetip otyr. Óńirlerde polısıa synyptarynyń alǵashqy túlekteriniń mekteppen qoshtasý rásimderi ótti. Almaty qalasynda polısıa departamentiniń bastyǵy Aıdyn Qabduldınov "Jas saqshy" synyptarynyń túlekterine sertıfıkattardy saltanatty túrde tabystap, olardyń patrıotızm men quqyqtyq mádenıetti nyǵaıtýǵa qosqan úlesin erekshe atap ótti. Aqtóbe oblysynda polısıa departamentiniń bastyǵy Qaıyrken Álıev te beıindik synyp túlekterine sertıfıkattar tabystap, jastardy azamattyq jaýapkershilik jáne qoǵamǵa qyzmet etý rýhynda tárbıeleýdiń mańyzdylyǵyna toqtaldy. "Jas saqshy" polısıa synyptaryn damytý İshki ister mınıstrliginiń jastardy patrıotızm, zań jáne quqyqtyq tártipti qurmetteý rýhynda tárbıeleýge baǵyttalǵan mańyzdy jumystarynyń biri bolyp qala beredi.