«Qazaqstan» RTRK AQ jáne «Hunan» teleradıokorporasıasy 2017 jyldyń 9 maýsymynda televızıa salasynda yntymaqtastyq pen ózara kelisim ornatý týraly memorandýmǵa qol qoıdy.
Hunan Television Qytaıdaǵy kórsetilimi eń joǵarǵy telearnalardyń arasynda ekinshi orynda tur. Qytaı Halyq Respýblıkasynyń úlken bóligin ǵana qamtyp qoımaı, Gonkong, Makao sıaqty arnaıy ákimshilik aýdandar men Taıvan aralyna da taratylady.
Sonymen qatar, «Qazaqstan» RTRK AQ baǵdarlamalary men jobalary «Mango TV» ınternet arnasynda kórsetiledi dep josparlanýda. Aıta ketsek, «Mango TV» óz kórermenderine kontenttiń barlyq janryn usynady. Olardyń ishinde túrli fılmder, telehıkaıalar, mýzyka, múltfılmder jáne oıyn-saýyq baǵdarlamalar men qatar «Hunan» teleradıokorporasıasy men Hunan Satellite TV-diń avtorlyq baǵdarlamalary da kórsetiledi. 2016 jyldyń kórsetkishine qaraǵanda, «Mango TV» ınternet arnasyna 39 mıllıonnan astam belsendi qoldanýshylar tirkelgen.
Joǵaryda aıtylǵandaı, eki korporasıa arasyndaǵy yntymaqtastyq sheńberinde jańa mýzykalyq jobany birlesip shyǵarý josparlanyp otyr. Maýsym aıynan bastap, tehnıkalyq - uıymdastyrýshylyq máseleler boıynsha qyzmet toptary men shyǵarmashylyq ujymnyń quramyndaǵy prodúserler, rejıserler, operatorlar óz jumysyna kirisetin bolady.
Hunan tele-radıo habarlaryn taratý Korporasıasynyń Prezıdenti Lúı Hýanbın: «Mýzyka men telearna eki el arasyndaǵy dostyqty odan ári nyǵaıtady» dep aıtty.
Sondaı-aq, 2018 jyldan bastap, jyl saıynǵy Halyqaralyq Taklimakan Rally» jol talǵamaıtyn motosıklder jarysynyń túsirilimi Qazaqstan Respýblıkasynyń aýmaǵynda júzege aspaq.
2005 jyldan bastap «Taklimakan Rally» Qytaıdaǵy eń bedeldi motosıklder jarysy bolyp sanalady jáne 2012 jyly Halyqaralyq avtomotosport federasıasynyń statýsyn alǵan. Bul joba qazaqstandyq kontentti Qytaı eline keńinen shyǵarýdy jáne týrızmdi damytýdy kózdeıdi.
"Atalǵan kelisimder otandyq kontentti sheteldik televızıalyq naryqqa shyǵarý úshin baǵyttalǵan. "Hunan TV" telearnasymen ornatylǵan yntymaqtastyq «Qazaqstan» RTRK AQ aýdıtorıasyn keńeıtýge múmkindik beredi, - deıdi Korporasıa basqarmasynyń tóraǵasy Erlan Qarın.
