Qazaqstan-Danıa qurama komandalary arasynda Almatyda ótken oıyn osyndaı oıǵa jeteleıdi. Ońbaı jeńildik.
Nege? Jasyl alańda dop tebetin qazaq balasynyń qarasy kóbeıip, qurama komandanyń jeıdesin kıgen jigitterdiń tóbe kórsetýi barsha jankúıerdi qýanyshqa bólep júr. Rıza bolasyń. Kezinde belgili sport jýrnalısi Nesip Júnisbaev talaı márte másele kóterip, shyryldap júrip «Namys» degen komanda qurýǵa atsalysty. Ózgeler urshyqsha úıiretin ala dopty bizdiń qarakóz uldar da meńgere alady degen maqtanysh sezimi ornady keýdemizde. Endi búgin Qudaıǵa shúkir, ol armanymyz oryndaldy.
Biraq «Qobylandy batyr» jyryndaǵy Taıbýyryldyń baptaýynyń bir kúni kem bolǵany sıaqty bizdiń fýtbolshylardyń, ásirese, qazaq jigitteriniń ustamsyzdyǵy udaıy kózge uryp turady.
Qazaqstan chempıonatynda talaı márte kýá bolyp júrmiz, joq jerden qorazdanyp, qarsy komandanyń oıynshysyn keýdemen qaǵyp, edireńdep shyǵa keletin oıynshylar az emes. Óte jaǵymsyz kórinis. Sol ádet Qazaqstannyń ulttyq qurama komandasyna shaqyrylǵan jigitterdiń boıynan jıi kórinedi.
Danıamen bolǵan kezdesýde de solaı boldy. Bizdiń komanda táp-táýir oınady. Biraq biz sóz etip otyrǵan psıhologıalyq álsizdik tyǵyryqqa tiredi. Birde Tańat Nóserbaev, endi birde Súıinbaev dat jigitterimen jaǵa jyrtysýǵa shaq qaldy. Baýyrjan Islamhan shyntaqpen dat oıynshysy Vıllám Kvısttiń jaǵynan qaǵyp jiberip alańnan qýyldy. Árıne, Danıa oıynshylary da qıt etse tóreshige shaǵymdanyp, qýlyq jasap jatty. Olarda sharýamyz joq.
Aıtpaǵym, el namysy sarapqa salynyp jatqan kezde bizdiń oıynshylar jaýapkershilikti sezinýi kerek edi. Olardyń jeke basynyń namysy el namysynan bıik emes. Qyzbalyq kimde joq. Osyny túsinýi kerek qoı. Islamhan qansha jerden sheber oıynshy bolsa da artynda el turǵanyn, Qazaqstannyń abyroıy úshin oınaıtynyn eskermedi. Jigitter namysty ekenin dórekilikpen emes, oıynymen kórseýi kerek.
Túbi mundaı «syrqatty», qazaq fýtbolynan túp-tamyrymen joıý kerek sıaqty. Áıtpese, aram shóp sıaqty qaýlap óse beredi.
Ǵabdýl Merqurman
