Basketbolshy Igor Nanaevtyń ólimi týraly is boıynsha sottalǵan bes azamattyń tórteýi Petropavl qalalyq sotyna úkimge qatysty apelásıalyq shaǵym túsirdi, dep habarlaıdy Qamshy aqparattyq agenttigi QazAqparatqa silteme jasap.
Sottalýshy Dımash Qoıbarov úkimge shaǵym bildirmedi. Oblystyq sottyń baspasóz qyzmetiniń aqparaty boıynsha, Soltústik Qazaqstan oblystyq soty qylmystyq ister boıynsha sot alqasynyń úkimimen Petropavl qalalyq sotynyń 2017 jyldyń 17 sáýirdegi úkimi ózgerissiz qaldy. Úkim zańdy kúshine endi.
Eske salaıyq, 2016 jylǵy 3 qazanda túngi úshterde bir top azamat esh sebepsiz Nanaev, Makedonov, Antropovty soqqyǵa jyqqan. B.Qaıbarov, B. Maqatov, J.Áskerov, A. Meńdibaev, O. Elamannyń birlesken zańǵa qaıshy áreketteriniń saldarynan jábirlenýshi Nanaev esinen tanyp qalǵan, ol jabyq mı jaraqaty, aýyr dárejeli mı jaraqaty, torly qabyq astyna qan quıylyp, mıdyń isýi, tómengi erni jyrtylyp, shyqshyq súıegi zaqymdanýy, tańdaı tisteriniń synýy syndy dıagnozdarmen SQO ákimdiginiń oblystyq aýrýhanasyna jatqyzyldy. 10 qazanda Igor Nanaev esin jımastan jansaqtaý bóliminde kóz jumdy. Jergilikti «Barys» klýbynyń múshesiniń ólimine baılanysty júzdegen adamnan jaýap alyndy.
Petropavl qalalyq sotynyń úkimimen Dımash Qoıbarov QR QK 293-baby 2-tarmaǵy 1-tarmaqshasy, 106-baby 3-tarmaǵy boıynsha kináli dep tanylyp, 9 jylǵa jalpy rejimdegi túzeý kolonıasyna bas bostandyǵynan aıyryldy. Baýyrjan Maqatov QR QK 106-baby 3-tarmaǵy boıynsha kináli dep tanyldy. Oǵan jalpy rejimdegi túzeý kolonıasynda jazasyn óteý úshin 8 jylǵa bas bostandyǵynan aıyrý jazasy belgilendi. Aıyptalýshy Maqatov zardap shegýshi Anatolıı Makedonovpen tatýlasty. Janbatyr Áskerov, Ádil Meńdibaev jáne Oljas Elamanovtar da 8 jyl jalpy rejimdegi kolonıada jazalaryn óteıtin bolady.
