Shyǵys Qazaqstan oblysy Kúrshim aýdanynyń polısıa bólimshesine zardap shekken 10 adamnan shaǵym túsken.  27 jastaǵy muǵalim ár túrli syltaýlarymen áriptesteriniń jeke kýálikterin surap, olardy sýretke túsirip sodan keıin kredıt rásimdep otyrǵan. Bul týraly Qamshy aqparattyq agenttigi informburo.kz-ke silteme jasap habarlaıdy.

«17 mamyr kúni ol meniń qasyma kelip men jańa maman bolǵandyqtan menen jeke bas málimetterimdi surady. Olardy elektrondy portfolıoǵa salamyn dep aıtqan. Arnaıy muǵalimder týraly aqparat jazylatyn saıt bar, sonda jarıalanady dedi»-dep esine túsiredi aldanǵan muǵalimderdiń biri.

Áıel kredıtti ár túrli baǵada rásimdegen. 27 myń teńgeden bastap 100 myń teńgege deıin.  Bir adamnyń atynan birneshe kredıt alǵan jaǵdaılar da bolǵan. Zardap shekken 10 adamnyń 2-ýi kredıtteri tólengendikten áıelge shaǵymdanbaıtyndyqtaryn jetkizgen.

Kredıt beretin uıymnyń ózi onlaın túrde qyzmet kórsetedi. Onda tez ári jyldam 300 myń teńgege deıin aqsha beredi. Onlaın-kredıt alý úshin jeke kýálik pen sýret júkteý ǵana qajet etiledi. Eń basty talap kredıt alýshynyń Qazaqstandyq bolýy kerek.

Aılaker muǵalim osyndaı tásilmen áriptesteriniń jeke kýálikteri men sýretterin ala otyryp kredıt rásimdegeni belgili bolǵan. Bul oqıǵaǵa baılanysty qylmystyq is qozǵalǵan soń  muǵalim jumystan óz erkimen ketip, kredıtterdiń ótemaqysyn tólep jatyr.

Sholýshy: Nazerke MUSA