OQO-da kólikti mas kúıde júrgizgen prokýratýra qyzmetkeri ustaldy, - dep habarlaıdy Qamshy aqparattyq agenttigi Tengrinews.kz saıtyna silteme jasap. 

OQO-nyń prokýratýra basqarmasynyń aǵa prokýrory Nurjan Polatov mas kúıde kólik júrgizgen. Qazir ol jazadan qutylý úshin sotqa aryz bergen. Ol baǵdarshamnyń tyıym salynǵan belgisine ótip ketkeni men mas kúıde rólge otyrǵany úshin toltyrylǵan ákimshilik hattamalardyń kúshin joıǵysy keledi. Mamyrdyń basynda Shymkent polıseıleri baǵdarshamnyń qyzyl túsine ótip ketken prokýratýra qyzmetkerin toqtatqan. Qujattardy tekserý kezinde polıseıler er adamnyń ishimdik ishkenin baıqaǵan. Medesınalyq saraptama bul derekti rastaǵan. 

Bolǵan jaıtty polıseıler vıdeojıton men uıaly telefondaryna túsirgen. Degenmen ákimshilik sot otyrysy ashyq kúıden jabyq kúıge aýystyrylǵan. Al 33 jastaǵy prokýratýra qyzmetkeri rólde ózi emes, jaqyn týysy otyrǵanyn aıtqan. Sot ákimshilik hattamalardy jaramsyz dep tapty. Degenmen vıdeoda jaǵdaıdyń basqasha bolǵanyn kórýge bolady. 

Vıdeoda Polatov Nurjan Salyhanuly ınspektorǵa júrgizýshi kýáligin bere otyryp, bolǵan jaǵdaı úshin keshirim surap jatqany, qobaljyp temeki shekkeni jáne saraptama qorytyndysyna qol qoıǵany kórinip tur. Ákimshilik sot bul vıdeony nazarǵa almady. 

Sot sheshimi áli zańdy kúshine engen joq jáne taraptardyń sheshimdi ózgertý úshin aryz berýlerine ýaqyty baryn aıta keteıik.