Tanymal prodúser Baıan Esentaeva óziniń alǵashqy kitabyn jaryqqa shyǵarýǵa daıyndalyp jatqany qazaq jurtshylyǵyna málim. Ol tyrnaqaldy týyndysynda burynǵy kúıeýimen otasqan 22 jylda basynan ótkergenin jaıyp salmaqshy. Alaıda aıaq astynan qolyna qalam alǵan Maqsatqyzyna aqyn-jazýshylardyń aıtary bar, dep jazady Qamshy aqparattyq agenttigi.

 «Eýrazıa» arnasyna bergen suhbatynda jazýshy Amanhan Álimuly opasyzdyqty elge jarıa etken Esentaevany synap tastady. «Qaltasynda qarjysy barlar kitap jaza bastady. Al shyn mánindegi aqyn-jazýshylar ekinshi planǵa ysyryldy. Mysaly, men bireýden kórgen opasyzdyǵymdy, jamandyǵymdy, bolmasa mahabbattan jolym bolmaǵandyǵyn, sátsizdikke urynǵanymdy kóz jasymdy kóldetip jazyp, sony jamandap, jaman etip kórsetip jazsam, ol eshqandaı moralǵa syımaıdy», – deıdi «Aqıqat» jýrnalynyń bas redaktory, jazýshy Amanhan Álimuly.

Al tanymal aqyn Myrzan Kenjebaı kitap shyǵarǵan Maqsatqyzynyń áreketine «baryp turǵan qylmys» dep baǵa berdi. «Baıan Esentaevanyń kitabynan meniń uldarym, meniń qyzdarym qandaı ónege alady? Baıan Esentaeva adam balasyna úlgi kórsetetin adam ba? Moraldyq jaǵynan onyń quqy joq. Basynan ótkenin jazyp, ony kóp danamen shyǵaryp, ony jurtqa nasıhattaý degen baryp turǵan qylmys», – deıdi ol.

Aıta keteıik, buǵan deıin Baıan Maqsatqyzy blogerge bergen suhbatynda ózin jazýshy retinde sanamaıtynyn, maqsaty - avtobıografıalyq kitap shyǵarý ekenin aıtqan bolatyn. Onyń ústine, kitap prodúserdiń ómirine qyzyǵýshylyq tanytyp, bilgisi keletin jandarǵa arnalǵan ekenin de aıtyp ótti.

Sholýshy: Gúlim Jaqan