Ulttyq ónerdi ulyqtap júrgen dástúrli ánshiler bul joly Óskemende bas qosyp, Ásettiń ánin qalyqtatty. Qazaqstannyń túkpir-túkpirinen kelgen jıyrmadan astam ónerpazdyń ishinen aıtýly óner báıgesinde oza shapqan astanalyq Jaqsykeldi Maıasarov bas júldege ıe boldy, dep habarlaıdy SHQO Aqparattyq ortalyǵy.
Áset Naımanbaıuly – qazirgi Qaraǵandy oblysy Aqtoǵaı aýdanynda dúnıege kelgen qazaqtyń sýyryp salma aqyny, ánshi- kompozıtory. Zamanynyń asqaq aqynyn ulyqtaýǵa arnalǵan «İnjý marjan» atty respýblıkalyq baıqaý SHQO dástúrli túrde ótkizilip keledi. Alǵashqy baıqaý Semeı qalasynda uıymdastyrylǵan bolatyn. Bul joly, respýblıkalyq baıqaý Óskemende ótkizildi.
Eki kezeńdik saıystyń kórkin qyzdyrǵan 23 ánshi syn tezinen ótýdiń ońaı bolmaǵandyǵyn sezingeni anyq. Talap boıynsha oryndalatyn ánderdiń ishinde Ásettiń áni bolýy mindetteldi. Baıqaýda esimi elge belgili Ramazan Stamǵazıev, Jarqyn Shákárim, Sáýle Janpeısova, Klara Tólenbaeva, Erlan Rysqalı, Berik Omarov syndy qaıratkerler qazylyq etti.
– Uly ónerdiń kóshin jalǵap júrgen ónerpazdarymyz osyndaı keń aýqymdy konýrstarda shyńdalady. Nazardan tys qaldyrmaı dástúrli ánshilerge qoldaý kórsetken SHQO basshylyǵyna alǵysymyzdy bildiremiz, – dedi Ramazan Stamǵazıev.
Qazaq ániniń qudireti aspandaǵan Jambyl atyndaǵy drama teatryndaǵy án baıqaýynyń shymyldyǵy keshqurym jabyldy. Baıqaýdyń jabylý saltanatynda sóz alǵan SHQO ákiminiń orynbasary Jaqsylyq Omar respýblıkalyq baıqaý ár eki jyl saıyn dástúrli túrde ótetinin aıtyp, jeńimpazdardy marapattady. Baıqaý qorytyndysy boıynsha jarty mıllıon teńge bas júldeni astanalyq Jaqsykeldi Maıasarov jeńip aldy. İ oryn almatylyq Jasulan Saqaevqa, İİ oryn Tólegen Shákárimov men Birjan Bázilhanovqa buıyrdy. Jasulan Qońyrov (Almaty), Beıbit Musaev (Taldyqorǵan) pen Syrym Muhametjanov (Qaraǵandy) İİİ oryndy mise tutty.
Qamshy-aqparat
