QR din isteri jáne azamattyq qoǵam mınıstri Nurlan Ermekbaev esep berý barysynda Sırıaǵa ketip qalǵandarǵa qatysty suraqtarǵa jaýap berdi, - dep habarlaıdy Qamshy aqparattyq agenttigi Tengrinews.kz saıtyna silteme jasap.

Mınıstr Sırıaǵa ketip qalǵan adamdarǵa qatysty máselelerdiń vedomstvonyń quzyretinde emes ekenin aıtyp túsindirdi. Onyń aıtýynsha, adamdardyń Sırıaǵa ketýi tek dinı nanym-senimdermen baılanysty emes.

"Bul adamdar ıslam qundylyqtaryn múlde durys túsinbeıdi. Bizdiń elde kez kelgen dinniń senýshilerine barlyq jaǵdaı jasalǵan. Eshkim eshkimge jábir kórsetpeıdi. Dinge senetin adamdardyń quqyqtary bar. Olar ózderiniń ádebıetin oqı alady, árıne, eger ol elimizdiń zańnamasyna qaıshy kelmese. Osylaısha elden ketip jatqan adamdar din degen sózdiń maǵynasyn burmalaıdy. Olar zańbuzýshy bolyp sanalady", - dedi Ermekbaev.

Vedomstvo basshysynyń aıtýynsha, zańnamada elden ketip qalǵan jáne terorıstik uıymdarǵa qatysyp júrgen adamdardyń sottyń sheshimimen azamattyǵynan aıyrylatyny jaıly norma qarastyrylǵan.

"Osy kezde ǵana elden ketken adamdardyń joly jabylady. Sondyqtan kez kelgen adam elden ketpeı turyp jáne terorıstik uıymdarǵa kirmeı turyp ózin jáne otbasyndaǵy basqa múshelerdi otanynan jáne azamattyǵynan aıyratynyn oılaý kerek. Sırıaǵa ketip jatqan adamdardyń 90 paıyzy óz isterine ókinip jatady. Bireýleri sonda qaza bolyp, otanyna qaıta almasa, taǵy bireýleri jazadan qorqyp, qaıtyp kele almaı otyr. Munyń barlyǵy Internettegi nasıhattyń saldarynan bolyp otyr. Sonda baryp, halıfatta ómir súrgisi keledi. Biraq onda eshqandaı halıfat joq, onda zorlyq pen urlyq jáne sol sıaqty qylmystyq áreketter bolyp jatatyn naǵyz qylmystyq uıymdar bar", - dedi Ermekbaev.

"Óz atymnan aıtarym, men qyzmetime baılanysty birneshe jyl boıy túrli qalalarda boldym. Ár elde kemshilik bar, ol bolady da. Bizde de kemshililikter bar. Biraq óz týǵan jerińnen jaqsy jer bolmaıdy. Eń jaqsy memleket - ol seniń otanyń", - dedi mınıstr Ermekbaev.