Keıde bizder túsinbeımiz áıeldi,
Áıel - ana terbetetin álemdi.
Judyryqtaı júrekpenen súımesek, 
Judyryqqa bolmas olar táýeldi.

Biz erkekter kóp nárseni qalaımyz,
Ózimizdi hannan artyq sanaımyz.
Úıimizdi jaryq qylyp turatyn,
Kúnimizge kúńimizdeı qaraımyz.

Shaıtan sýdy iship alsaq myna biz, 
Aıaq asty batyr bolyp shyǵamyz.
Kúshtilerge kúshimizdi kórsetpeı,
Kúshteri joq áıelderdi uramyz.

Qaıtsin endi baıǵus áıel shydaıdy, 
Taıaq jegen qaı adamǵa unaıdy?
Úlken kúná jan jaryńa qol jumsaý, 
Umytpaıyq kórip turǵan Qudaıdy!

Sabaıtyndaı sonshalyqty nesi bar,
Keıbir erkek óz qatesin kesh uǵar. 
Áıelińe jumsar kezde judyryq,
Óz anańdy, óz ápkeńdi esińe al.

Belimizdi býatyn da sol - áıel,
Kıimińdi jýatyn da sol - áıel.
Kesh kelsekte asymyzdy jylytyp,
Balamyzdy týatyn da sol - áıel.

Qabaǵyńnan uǵatyn da sol - áıel,
Kútip aldan shyǵatyn da sol - áıel.
Saǵat túngi on ekiden asqan soń,
Habarlasyp turatyn da sol - áıel.

Súıip qana kórset oǵan shamańdy,
Tek mahabbat kórkeıtedi adamdy.
Áıel - ana, óz anańdaı qarasań, 
Ol da seniń qurmetteıdi anańdy.

Jazǵan jyrym sáıkes kelmes barshaǵa,
Otbasy bar jurt qaraıtyn tamsana.
Baǵasy joq erkek te bar ómirde,
Sanasy joq áıelder de qanshama.

Biz erkekpiz ar-namysty bir betkeı,
Júreıikshi sol ataýdy kirletpeı.
Áıelderdi aıalaıyq árqashan,
Janarlaryn jasqa malyp muńdy etpeı.

Jylamasyn júrektegi muń ketsin, 
Kórsete bil súıip alsań qurmet shyn.
Aralaryń berik bolyp bastysy,
Otbasyńdy ózge jandar úlgi etsin.

Erdiń isi - óz áıelin qaratý, 
Tamyryna sezim nárin taratý.
Sen erkeksiń, ozyp turǵan onsyzda,
Áıelińnen ozam deseń bala tý.

Tyńda meni, aǵa-ini, baýyrym,
Alla artqan bizge júktiń aýyryn. 
Júgimizdi kóterisip júretin,
Renjitpeıik áıelderdiń qaýymyn.

Oǵan degen júregińdi jyly usta,
Kózben uqtyr eshqashanda uryspa. 
Áıel degen qabyrǵańnan jaralǵan,
Qabyrǵany túzeımin dep tyryspa.
Sen erkeksiń ór keýdeli, eńseli,
Sol eńseńdi túsirmesten tik usta!!
Durys pa???

Áı-áı áıelderge...

Tekti qaıdam, teksiz týsa tektiden,
Epti qaıdam, epsiz týsa eptiden. 
Kúıeýinen qoryqpaıtyn áıeldi, 
Qudaıdan da qoryqpaıdy dep bilem.

Kórip júrmiz áıelderdiń túr túrin,
Balasynan artyq kúter kirpigin.
Al, áıelder, aıtyńdarshy erkeksiz
ertegideı ótedi me bul kúniń?

Senbeńizder qıal toly ertekke,
Ertekke emes sený kerek erkekke.
Erkektersiz ótken ómir - ókinish,
Ókinishten barmaq tistep, jer teppe.

Erkek degen - bostandyqty qalaıdy,
Kóz bolǵan soń qarakózge qaraıdy.
Qaraı bersin qarasa da báribir,
Seni ǵana perishtege balaıdy.

Oǵan bola túspesinshi eńseńiz, 
Eń bastysy ony súıip, senseńiz.
Aldamaıdy, qaramaıdy basqaǵa,
Júregine sál tynyshtyq berseńiz.

"Qydyrsyn" dep úıde jalǵyz qaldyń ba,
Berilmeshi qyzǵanyshqa, ár muńǵa.
Habarlasyp ala berme mazasyn, 
Uıat bolar dostarynyń aldynda.

Hat jazyp qoı oǵan sol da jetedi,
Erkek degen - árkez eleń etedi.
Keıde túzý, keıde qısyq ketedi, 
Óz tósegi oralatyn mekeni!

Áıelder-aı, kóz izdeıtin soqyrdan,
Soqyrdyń da kózi áıelden shoqylǵan. 
Atalarym attanǵanda soǵysqa,
Ájelerim úıde kútip otyrǵan.

Eń bastysy adal - Senim, asqaq - Ar,
Ekeýinsiz oıdy shaıtan basqarar.
Kúıeýleriń dostaryna attansa,
Kerisinshe úıde soǵys bastalar.

Aqylmenen sheshińizder - aqylym, 
Ómir qysqa ólshep bergen shaqyrym.
Keıde sharshap jumysynan kesh kelse,
Asyn berip jatqyza sal aqyryn.

Erkek degen - óz balańdaı tuńǵyshyń,
Erkek degen - baqyt qusyń, jyl-qusyń.
Erkek túzde júrgennen soń qashanda,
Jan jaǵynan jasalady myń qysym.

Túsin ony... syry-qaıǵy, muńy-sher,
Ol sıaqty taǵdyr ýyn kim isher?
Erkek degen - aıfon sotka sıaqty,
Sıpap qalsań óz isine kiriser.

Erkek ǵana - buıryq berer Patshańyz,
Erkek ǵana - jemis tóger baqshańyz.
Murynymdy kesip sizge bereıin,
Sol erkekten artyq bireý tapsańyz.

Erkek degen - erkeleter kúıeýiń,
Erkek degen - súıenerde súıeýiń. 
Dári-dármek ýytyna ketpeıtin, 
Erkek degen - júrektegi súıeliń.

Buıyrǵanmen qydyrystyń myń sáti,
Sizge zakon sol kisiniń ruqsaty.
Bir satyǵa tómen bolsań baǵynyp,
Kúıeýińdi kótergeniń bir saty!

Aıtatynyn qabaǵynan uǵyńdar, 
Artyq ketse bárin ishke tynyńdar.
Jyly sózdi anda-sanda estıtin,
Erkekterdi erkeletip turyńdar!!

Avtory: Saıat Ábenov