Pákistandaǵy Pendjab provınsıasynda aýdarylǵan benzovoz jarylyp, 149 adam tirideı janyp ketken jáne taǵy 100-i zardap shekken. Kóbi aýrýhanaǵa aýyr jaǵdaıda túsken. Bul týraly Qamshy aqparattyq agenttigi Tengrinews málimetine súıene otyryp habarlaıdy.
Bul oqıǵa 25 maýsymda tańǵy ýaqytta Bahavalpýr qalasynyń túbinde boldy, - dep habarlaıdy GEO TV. Benzın tasıtyn kólik aýdarylǵannan keıin jergilikti turǵyndar oqıǵa ornyna jınalǵan. Kýágelerdiń aıtýynsha, keıbiri shylym shegip turǵan, bul órttiń sebebi bolýy múmkin eken. Qaza tapqandardyń kim ekeni DNQ saraptama ótkizgennen keıin anyqtalady. Órtten ondaǵa kólik pen tehnıka túgi qalmaı órtenip ketken.
Pákistan bul oqıǵany ulttyq tragedıa dep atady. Memleket basshylary qaza tapqandardyń týystary men el basshylyǵyna kóńil aıtyp jatyr. Al oqıǵanyń sýretteri men vıdeolary áleýmettik jelilerde taralý ústinde.
Sholýshy: Aqerke Maratqyzy
