Tájikstanda eki adamdy óltirdi degen kúdikpen Hatlon oblysy Pándja aýdanynyń turǵyny tutqyndaldy. Oǵan kúıeýiniń týystaryn ý berip óltirdi degen aıyp taǵylýda, dep habarlaıdy Qamshy aqparattyq agenttigi novosti.kg saıtyna silteme jasap.

İİM deregine sáıkes, Hatlon oblysynyń Pahtakor qystaǵynyń 37 jastaǵy turǵyny qasaqana túrde óziniń kúıeýiniń týystaryna ý bergen. Áıel alǵash turmys qurǵan kúnnen bastap óziniń 43 jastaǵy erin jaqtyrmaǵan.

2014 jyly 29 maýsymda ózderiniń kýrýtob atty ulttyq taǵamyn ázirlep, oǵan ý qosyp qoıǵan. Keıinnen ý qosylǵan tabaqty ádeıi kúıeýiniń týystary jumys istep júrgen jaqqa aparyp bergen. Otbasy músheleri kýrýtobty jegennen soń aýyr halde aýrýhanaǵa túsken. Olardyń arasynda ol áıeldiń kúıeýiniń 39 jastaǵy aǵasy men onyń 34 jastaǵy áıeli jáne de olardyń kámeletke tolmaǵan úsh balalary bolǵan. Sonymen qatar Dýshanbeniń turǵyndary – jıeneri – 19, 38 jáne 36 jastaǵy er adamdar bolǵan. Ýlaýdyń nátıjesinde, 39 jastaǵy aǵasy aýrýhanada kóz jumǵan. Alaıda, kelin munymen bul isin toqtatpaǵan.

Dál sol jyldyń qyrkúıek aıynda búkil otbasyna ýlanǵan nan bergen. Pándja aýrýhanasyna 34 jastaǵy jesir áıel men onyń kúıeýiniń 26 jastaǵy qaryndasy kelip túsken. Sonymen qatar 4 jastaǵy búldirshin de aýrýhanaǵa túsip, sol jerde kóz jumǵan. Sol kúni kelin úsh kúndik aza tutý kúnine kelgen adamdarǵa arnap taǵy da ýlanǵan nan pisirip bergen. Nátıjesinde jeti adam Qurǵan-Tóbe qalasyndaǵy aýrýhanaǵa jetkizildi.

Alaıda, ýlanǵan tamaq berip birneshe adamdarǵa qastandyq jasaǵan kelin ustalyp, qazirgi tańda oǵan qarsy «Adam óltirý» baby boıynsha qylmystyq is qozǵalǵan.

Sholýshy: Nazerke Labıhan