Saý baryp, sal bolyp qaıtty! Áskerge barǵanyna eki-aq aı bolǵan jas sarbaz múgedek bolyp qalýy múmkin. Qazarmada ústine tósek qulaǵan 19 jastaǵy  Baqbergen Qalamysh bel omyrtqasy synyp, hál ústinde jatyr. Dárigerler onyń aıaqqa turyp ketetinine eshqandaı kepildik bermeı otyr. Al Bahbergenniń ákesi tepse temir úzetin saý ulymdy osyndaı jaǵdaıǵa jetkizgen komandırlerdiń salǵyrttyǵy deıdi.  Bul týraly Qamshy aqparattyq agenttigi KTK arnasyna silteme jasap habarlaıdy.

Tútiksheden sý iship, basyn kótere almaı jatqan jas jigit Baqtıar Qalamysh. Otan aldyndaǵy boryshyn óteý úshin Pavladar oblysynan áskerge shaqyrtylyp, Otardaǵy 82 796 áskerı bóliminde qyzmet etken. Endi eki aı ótpeı Almatydaǵy aýrýhanada jatyr. Sóıleýge de shamasy joq.

Qalamysh Jaqsylyquly, Baqbergenniń ákesi:

- Barlyǵy kazarmanyń aldynda bolǵan. Ol jerde palatka turǵan. Temir nar tósekti balalar ózi qurǵan eken. Soǵan jatqanda meniń balam astyńǵy qatarda bolǵan. Tósek taıyp kelip belin basqan.

Temir tósekpen birge on shaqty bala ústine qulaǵanda Baqbergenniń bel omyrtqasy synyp, julynyna zaqym kelgen. Qazir belden tómen jan joq. Dárigerler aıaǵyna turyp ketýi eki talaı dep otyr. Al ákesi buǵan áskerı bólim basshylaryn kinálaıdy.

Qalamysh Jaqsylyquly, Baqbergenniń ákesi:

- Balamdy kúnin keshiktirmeı tezdetip jaqsy bolnısıaǵa, kerek bolsa shetelge aparyp emdep bersin. Saý bala bergenmin, balamdy endi arqalap qaıtqym kelmeıdi. Materıaldyq maraldyq shyǵyndardy talap etem.

Qamkóńil ákeniń ulyna massajıst pen psıhologty da aldyrta almaı júrgenine eki apta bolǵan. Biraq áskerıler asyǵar emes.

Samat Túlepbaev, «Ońtústik» óńirlik áskerı qolbasshylyǵy tárbıe bóliminiń bastyǵy:

-Bul oqıǵa boıynsha sotqa deıingi tergeý jumystary júrgizilip jatyr. Sonyń nátıjesi boıynsha naqty sharalar qoldanylady. Baqbergennen basqa eshkim zardap shekpegen. Qazir oǵan barlyq kómek kórsetilýde. Tezirek jazylyp ketýin kútemiz.

Al, Baqbergenniń ákesi qarap otyrmaq emes. Áskerı prokýratýraǵa aryz jazyp, boryshyn óteýge ketken ulynyń qaýipsizdigine jaýaptylardyń  qatań jazalaýyn talap etpek.

Sholýshy: Aıerim Taýbaı