Búgin, 3-qarasha kúni elordamyz Astana qalasynda «Shabyt» XVII halyqaralyq ónerli jastardyń festıvali bastaldy. Talantty, shyǵarmashyl jastardyń basyn qosqan baıqaý shymyldyǵy Beıbitshilik jáne Kelisim saraıynda ashylady. Ónerpazdar dodasy qarashanyń segizine deıin jalǵasady.
Bıylǵy «Shabyt» burynǵydan ózgerek. Sebebi, festıvál baǵdarlamasyna jańadan «Ulttyq mýzyka» jáne «Kameralyq hor» nomınasıalary qosylǵan. Endi jan-jaqtan jınalǵan jastar halyq aldyna shyǵyp, óneri arqyly shyn talantqa tusaý joq ekenin dáleldeı alady.
Baıqaýdy uıymdastyrýshylardyń sózinshe, «Ulttyq mýzyka» nomınasıasy boıynsha óner kórsetetinder kóp. Ásirese, olardyń arasynda Qytaı Halyq Respýblıkasynan kelgender sany basym. Qytaıdan arnaıy kelgen qandastarymyz osy halyqaralyq baıqaý aıasynda úrmeli (sazsyrnaı, sybyzǵy, naı) jáne shertpeli (jetigen, shathan) aspaptarda oınap, halyqty tańǵaldyrmaq nıette.
«Shabytta» baǵy men babyn synap kórý úshin elimizdiń túkpir-túkpirinen jastar jınaldy. Qatysýshylar sany boıynsha Soltústik Qazaqstan oblysy men Shymkent qalasy alda tur. Jalpy «Shabyt» shyǵarmashyl jastar festıvalinde bas syılyq – QR Prezıdentiniń kýbogy, gran-prı jáne 1,2,3 oryn Laýreaty qurmet dıplomy, sondaı-aq, «Shabyt» medali beriletin bolady. Bul festıváldiń dıplomanty ataný arqyly talaı daryn úlken ónerge joldama alady.
Baıqaý kórsetilimderinen bólek, qosymsha is-sharalar uıymdastyrylady. Qazylar alqasy músheleriniń konserti, mýzykalyq-kóńil kóterý shoýy, art-klýb – tanysý keshi, festıvál laýreattaryna arnalǵan qala ákimdiginiń baly ótedi dep josparlanýda. Sonymen qatar, uıymdastyrýshy komıtet shtabynda mádenı problemalar men ózge de ózekti taqyryptarda dóńgelek ústel ótkizilmek.
Halyqaralyq deńgeıdegi óner juldyzdarynyń sheberlik saǵattary jastar úshin asa mańyzdy oqıǵa bolmaq. Al baıqaý jeńimpazdary men laýreattaryn marapattaý Gala-konsertpen aıaqtalady. Halyqaralyq óner dodasyn ótkizýge Astana qalasy ákimdigi men Astana qalasy Mádenıet basqarmasy jáne Qazaq Ulttyq óner ýnıversıteti qoldaý kórsetken.
