Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynda «Teatr - ómir aınasy» baǵdarlamasy ótip jatyr. Bul óner ordasynyń Almaty oblysy İle aýdanynyń ákimshiligimen birlesip júzege asyrǵan is-sharasy. Ol 4-shi qarasha kúni M. Maqataevtyń «Men umytylmaımyn...» (rejıseri B.Seıitmamytov) lırıkalyq dramasymen bastaldy.
6-shy qarashada R. Kıplıngtiń «Maýglı» (rejıseri J. Hadjıev) ertegisi, 7-shy qarashada Ó.Boranbaevtyń «Er kójek» (rejıseri I. Ábilmájinov) mýzykalyq ertegisi men Iran-Ǵaıyptyń «Estaıdyń Qorlany» (rejıseri M.Ahmanov) mahabbat-namasy qoıylatyn bolady.
Teatrdyń bas ákimshisi Gúlzıa Esenjanovanyń aıtýynsha, teatr qoıylymdaryn kórgennen keıin aýdan mektepterinde «Teatr - ómir aınasy» tárbıe saǵaty ótkiziledi. Ol Elbasynyń «Qazaqstan joly – 2050: bir maqsat, bir múdde, bir bolashaq» dep atalatyn halyqqa arnaǵan bıylǵy Joldaýyndaǵy «jalpy qazaqstandyq mádenıetti damytýǵa jańasha serpin berý» mindeti aıasynda qolǵa alynyp otyr. Basty maqsat - óskeleń jas urpaqqa elimizdiń mádenı-rýhanı jáne patrıottyq-ıdeologıalyq saıasatyn júrgizý jáne qazaq teatr ónerin nasıhattaý. Sebebi teatr – halyqqa estetıkalyq, rýhanı, patrıottyq tárbıe beretin bir
egeı mádenıet oshaǵy. Al álemdik jahandaný úderisi ekpin alǵan kezeńde el bolashaǵyn aıqyndaıtyn óskeleń urpaq - balalar men jasóspirimder tárbıesiniń mańyzy kún sanap artyp kele jatyr.
