Qytaıdaǵy Shyńjańda etnıkalyq qazaq ımamy polısıa bólimshesinde kóz jumdy dep jazady Qamshy.kz aqparat agenttigi islam.kz-ke silteme jasap. Tártip saqshylary ımamnyń ózine qol salǵanyn alǵa tartyp otyr dep habarlady RFA jańalyqtar qyzmetine jergilikti derekkóz.
Habae ýezinde turatyn Ahmet esimdi ımamdy Sandjı provınsıasynyń bılik ókilderi qamaýǵa alǵan bolatyn.
"Ne bolǵanyn naqty bilmedik, bıliktiń ony ne sebepti qamaýǵa alǵany da belgisiz. Degenmen eki-úsh kúnnen keıin onyń asylyp qalǵany týraly habar kelip jetti", - deıdi jańalyqtar qyzmetine derekkóz.
"Olar ımamnyń máıitin otbasyna qaıtardy", - dep jalǵastyrdy oqıǵadan habardar azamat.
Derekkózdiń aıtýynsha, osyǵan deıin óńirde Oqan esimimen tanymal qazaq ımam Habae okrýginde túrmege on jylǵa qamalǵan kórinedi. Oǵan er adamnyń ıslam zańdaryna sáıkes dástúrli jerleý ótkizgeni sebep bolǵan deıdi derekkóz.
"Tachen aýdanynda turatyn taǵy bir qazaq jigiti WeChat-qa bir habarlama jibergeni úshin segiz jylǵa qamaýǵa alynǵany belgili. Sonymen qatar, aǵasyna dinı maǵyna beretin qazaq ánin joldaǵan Kýmýl qalasyndaǵy etnıkalyq qazaq mýzykanty da segiz jylǵa qamaýǵa alynǵan", - dep jalǵastyrdy derekkóz.
"Bul jigitter ekstremıster emes edi. Olar dinı maǵynadaǵy pop-ándi jazǵan bolatyn. Aǵaıyndylardyń biri ekinshisine osy ándi joldaǵany úshin segiz jylǵa qamalyp ketti", - dep kúıindi derekkóz.
Sol arada atalmysh Radio Free Asia jańalyqtar qyzmeti men uyghuramerican.org saıty qaza bolǵan ımam Ahmettiń 100-den astam dosy men synyptasyn polısıa qamaýǵa alyp jatqanyn jazǵan.
"Tórtinshi maýsym kúni qamaýǵa alynǵannan keıin asylǵan kúıi tabylǵan ımamnyń qazasy týraly ınternette sóz etken onyń 100 shaqty dosynyń izine Qytaı polısıasy tústi. Endi Shyńjańda Ahmettiń isine nazar aýdarǵan kez kelgen adam qamaýǵa alynyp jatyr. Olar Shyńjań boıynsha ımamnyń 100-den astam dosy men synyptasyn qamaýǵa alyp úlgerdi. Olardyń keıbiri - Shyńjań ıslam kolejiniń túlekteri", - deıdi jańalyqtar qyzmetiniń derekkózi.
Derekkózdiń sózine sensek, bılik óńirde áıelderge uzyn beldemshe kıýge tyıym salǵan.
"52 jastaǵy etnıkalyq qazaq Gúljaına Tısak qysqa beldemshe kıýden bas tartqany úshin arnaıy qaıta tárbıeleý ortalyǵyna jiberildi.Eldegi kez kelgen jergilikti musylman sot sheshiminsiz 15 kúnnen bastap bir jylǵa deıin atalmysh ortalyqqa jiberile alady. Qarsylyq bildirgender qylmystyq jazaǵa tartylýy múmkin", - dep jalǵastyrdy derekkóz.
