Mańǵystaý oblysynda júzge tarta adam ekinshi kún qatarynan qashqyn sarbazdy izdestirýde. 21 jastaǵy Sergeı Pyhalov dárigerlik tekserý kezinde ájethanaǵa suranyp, sodan ushty-kúıli joǵalǵan.

Qazir taban jaltyratqan jigittiń sýretteri qoǵamdyq oryndarda ilinip, keń kólemdi izdeý sharalary qolǵa alynǵan. Odan bólek, dál sol áskerı bólimniń taǵy bir jaýyngeri qoly tilim-tilim bolǵan kúıi oblystyq aýrýhanaǵa jetkizilgen, dep habarlaıdy Qamshy.kz aqparat agenttigi KTK telearnasynyń málimetine súıenip.

Bul jaǵdaılarǵa qatysty bólim basshylyǵy mardymdy málimet bermeı otyr. Belgilisi, eki sarbaz da ásker qataryna bir aı buryn Qaraǵandy oblysynan shaqyrtylǵan. Al osynsha jaǵdaıǵa sebep bolatyndaı áskerıler arasynda eshqandaı basarazdyq joq kórinedi. Aýrýhanaǵa túsken jigit bolsa, qolyn dárethanadaǵy aınadan jaraqattap alypty. Qazir eki jaǵdaımen de áskerı prokýratýra aınalysyp jatyr.

- Kezegi kelgende jetekshisi ony dárethanaǵa deıin ertip aparǵan. Odan ári qajetin ótep, jýynyp jatqan. Shamamen bir mınýttan keıin jetekshisi esik ashqanda kórgeni mynaý. Qabyrǵadaǵy aına qulaǵan, ol ustap qalam degende qolyn kesip ketken,- deıdi 6656 áskerı bóliminiń vzvod komandıri Tólegen Bahtınov.

Sholýshy: Aıgerim Taýbaı