15 shildeden bastap EKSPO-2017 kórmesiniń bılettik baǵdarlamasyna ózgerister engizilip otyr, dep habarlaıdy Qamshy.kz aqparattyq agenttigi sputniknews.kz - ke silteme jasaı otyryp.

«1-10 shilde aralyǵynda Astana kúnine oraı biz birqatar aksıa ótkizdik. Osy aksıalardyń ishinde «Jastar bıleti» men «Keshki bıletke» suranys joǵary boldy. Búginge kúnge deıin jastar bıletin 50 myńnana astam, al keshki bıletti 40 myńǵa jýyq adam paıdalandy. Kórmege kelýshiler arasyndaǵy qyzyǵýshylyqty eskerip, biz taǵy da jeńildikter jasaýdy sheshtik», — dep málim etti búgin baspasóz máslıhatynda «EKSPO-2017 Astana» UQ  AQ kommersıalızasıa departamentiniń dırektory Dáýlet Erkimbaev.

Áý bastan EKSPO kórmesiniń 4 bılet túri qarastyrylǵan bolatyn. Jumys kúnderi 4 myń jáne 6 myń teńgelik bılet, al demalys kúnderi úshin 6 myń jáne 8 myń teńgelik bılet túri boldy

«Endi biz tek 2 bılet túrin qaldyramyz — baǵasy 4000 teńgelik kirý kúni belgili bılet jáne 6000 teńgelik kez kelgen kúni kirýge múmkindik beretin bılet. Osylaısha, demalys kúnderiniń bıleti bolmaıdy», — dedi ol.

Budan bólek, keshki bıletter satylady, olardyń baǵasy eki ese arzan — 2000 teńge. Osy rette azamattardyń keıbir sanattary úshin qarastyrylǵan 50 paıyz jeńildik saqtalady. Aıtalyq, endi mektep oqýshylary men zeınetkerler 1000 teńgege kórmege kire alady.

Sondaı-aq, búginge kúnge deıin 6 jáne 8 myń teńgelik  demalys kúnderiniń bıletin alyp qoıǵandar úshin de  jeńildikter qarastyrylyp otyr.

«Kirý kúni belgilengen bılet alǵandar kasada 1000 teńge qosymsha tólep, kez kelgen kúnge ekinshi bılet satyp ala alady. Al datasy ashyq bılet alǵandar osy bılet arqyly kórmege eki ret kire alady. Iaǵnı, sol kúni eki ret kórmege kire alady nemese bıletti basqa kúni ekinshi ret paıdalana alady», — dep habarlady Erkimbaev.

Satylymdaǵy abonementterdiń baǵasy da arzandamaq. Olardyń bastapqy baǵasy 50 myń teńge bolǵan. Endi erteńnen bastap bul abonementter 25 myń teńgege satylady.

«Abonementke de bıletke sekildi 50 paıyz jeńildikter qarastyrylǵan. Osylaısha, oqýshylar men zeınetkerler abonementti bar bolǵany 12,5 myń teńgege satyp alý múmkindigine ıe. Búgingi kúni kórmeniń jartysy derlik ótip ketti. Kórmeni sapaly kórip shyǵý úshin 5 kún kerek. Osyǵan oraı biz osyndaı arnaıy aksıalar ótkizip jatyrmyz», — dep atap ótti departament dırektory.