Shildeniń 13-i kúni Italıanyń Mılan qalasynda oblys ákimi Altaı Kólginov bastaǵan batysqazaqstandyq delegasıanyń qatysýymen bıznes-forým ótti. Elbasynyń respýblıkamyzǵa ınvestısıa tartý jónindegi tapsyrmasyna sáıkes uıymdastyrylǵan forýmǵa «QPO b. v.» kompanıasynyń jáne ıtalıanqazaq saýda palatasynyń ókilderi qatysty. Bul týraly Qamshy.kz Oblys ákiminiń baspasóz qyzmetine silteme jasap habarlaıdy.
Sharaǵa kelgen ınjı-nerıngpen, munaıgaz salasyna qural-jabdyq shyǵarýmen aınalysatyn ıtalıandyq iri kompanıalardyń basshylaryna Batys Qazaqstan oblysy ekonomıkasynyń negizgi salalary, ınvestısıalyq áleýeti, óńirdi munaıgaz klasterine baǵyttalǵan mashına jasaý ortalyǵyna aınaldyrý týrasyndaǵy is-sharalary tanystyryldy.
– Memleket basshysy óz Joldaýynda aýyl sharýashylyǵy salasyn ekonomıkanyń draıverine aınaldyrý qajettiligin aıtqan edi. Elimizdiń basqa óńirlerindegi sekildi bizde de bul sala jaqsy damyǵan. Tabıǵı, ekologıalyq taza ónimderdi shyǵarýǵa múmkindik mol. Sóıtip, elimizdiń batys aımaǵynyń agroónerkásip ónimderine degen suranysyn tolyǵymen qanaǵattandyrýǵa bolady. Sonymen qatar EAEO men EO elderine de azyq-túlik eksportynyń kólemi jyl ótken saıyn artyp keledi. Bul baǵytta sheteldik ınvestorlar úshin túrli jeńildikter qarastyrylǵanyn da aıta ketkim keledi. Sol sebepti ıtalıandyq kásipkerlerdi osy salaǵa ınvestısıa salýǵa shaqyramyn. Jalpy, sheteldik kompanıalardyń oblysymyzǵa ınvestısıa salýǵa qyzyǵýshylyǵy zor. Oǵan kabeldi-symdy ónimder shyǵarýmen aınalysatyn kásiporyn, jylyjaı sharýashylyǵynyń qurylysy, zaman talabyna saı keletin jańa qonaqúı salý jobalary mysal bola alady. Reseıdiń bes birdeı gýbernıasymen shektesetin jáne jedel qarqynmen damyp kele jatqan oblysymyzda basqa da túrli jobalar bar.
Búgingi sharany paıdalanyp, sizderdi jáne sizder arqyly ózge de ıtalıandyq kásipkerlerdi Elordamyzda ótip jatqan «EKSPO –2017» kórmesin tamashalaýǵa shaqyramyn. Sonymen birge Oral qalasynda dástúrli túrde ótetin «WestKazInvest – 2017» forýmynada shaqyrǵym keledi. Onda sheteldik qonaqtarǵa otandyq kásipkerlermen kezdesip, ózara pikir almasý, jańa ónim túrlerin shyǵarý, birlesken kásiporyn qurý týrasynda kelisimmen ýaǵdalastyq júrgizýge barlyq jaǵdaı jasalady, – dedi Altaı Seıdiruly.
Jıyn barysynda óńirimizdegi ındýstrıaldy aımaqty damytýǵa ıtalıandyqtar da óz úlesterin qosa alatyndary aıtyldy. «QPO b. v.» kompanıasynyń qatysýymen júzege asyryp jatqan jobanyń óńirdi munaıgaz klasterine baǵyttalǵan mashına jasaý ortalyǵyna aınaldyrýǵa qosar úlesi zor.
Forýmnan soń oblys ákimi ıtalıandyq kompanıa basshylarymen jeke kezdesti. Sonyń nátıjesinde iri ınvestorlar oblystyń bıznes áleýetimen jan-jaqty tanysý úshin Aq Jaıyq óńirine arnaıy baratyndaryn jetkizdi.
Aıta ketý kerek, 2016-2017 jyldary oblys ákimdiginiń qoldaýymen memlekettik jáne salalyq baǵdarlamalar aıasynda otandyq óndiris oryndary jańǵyrtylyp, jańa kásiporyndar ashylýda. Olardyń ishinen Oral transformator zaýyty bazasyndaǵy álemge tanymal «AVV» markasyndaǵy elektrqalqan qurylǵylarynyń, «Kondensat» AQ bazasynda ekologıalyq klasty «Eýro-5» motor maıynyń jáne Oral saýda-ónerkásip kompanıasy óndiristik sehtaryn jańǵyrtyp, jetekshi nemis tehnologıasyn qondyrýdyń arqasynda polımer qubyrlar shyǵarý óndirisin aıtýǵa bolady.
