Rım kelisimshartynyń 60 jyldyǵyn atap ótý aıasynda Almaty qalasynyń «Kinopark 11 IMAX Esentai» kınoteatrynda Eýropa kınofestıvali ótýde. Bıyl kórermender nazaryna Eýropalyq Odaqqa múshe memleketterdiń úzdik kınofılmderi usynylýda. Festıvál baǵdarlamasyna Chehıa, Avstrıa, Shvesıa, Estonıa, Ispanıa, Slovenıa, Germanıa, Nıderlandy, Rýmynıa, Slovakıa jáne Latvıa elderinde túsirilgen 11 fılm kirdi.
Kıno týyndylary arasynda ár túrli janrdaǵy kıno salasyndaǵy halyqaralyq marapattardyń júldegerleri men úmitkerleri bar, atap aıtqanda, 1987 jylǵy «Oskar» syılyǵynyń úzdik sheteldik fılm atalymyna úmitker - "Derevenka moıa sentralnaıa" fılmi (Chehıa), Eýropa kınoakademıasynyń júldegeri, 10 "Goııa" syılyǵynyń ıegeri - "Mınıatúrnyı ostrov" (Ispanıa) fılmi, Rýmynıa kınematografıster odaǵy syılyǵynyń ıegeri - "Obezglavlennyı petýh" fılmi jáne taǵy basqalary.
20 shilde kúni festıváldiń ashylý rásiminde kórermenderge qazaqstandyq rejıser Katerına Sývorovanyń "Zavtra more" fılminiń kórsetilimi, sondaı-aq, rejıserdiń kórermendermen kezdesýi bolyp ótti. "Zavtra more" derekti fılmi burynǵy Aral teńizi jaǵalaýy turǵyndarynyń ómirin baıandaıdy. Fılm Robert Bosh atyndaǵy nemis qory taǵaıyndaıtyn granttyń júldegeri bolyp tabylady. Fılmniń tusaýkeseri 2016 jyly tamyzda Lokarno kınofestıvalinde ótken bolatyn.
Sharanyń ashylý saltanatyna Qazaqstandaǵy Eýropalyq Odaq ókildiginiń basshysy Traıan Hrıstea jáne «Zavtra more» derekti fılminiń rejıseri Katerına Sývorova qatysty.
«Festıvál fılmderi eýropalyq kınoóndiristiń túrli janrlaryn qamtıdy. Bizdiń jyl saıyn uıymdastyratyn eýropalyq kınofestıvalderimiz tek jarqyn kartınalardyń kórsetilimi ǵana emes, sonymen qatar, Qazaqstan men Eýropanyń mádenı ári áleýmettik jaǵynan tájirıbe almasýynyń kórsetkishi. Biz Almatydaǵy jankúıerlerimizge eýropalyq bolmys álemine saıahattaýlaryna múmkindik beretinimizge qýanyshtymyz», - dep, atap ótti Elshi Traıan Hrıstea.
Fılmder orys tilindegi sýbtıtrlermen birge túpnusqa tilinde kórsetiledi. Barlyq fılmderge kirý tegin jáne keshki saǵat 19:00-den bastap kórsetiletin bolady.
Kınofestıvaldiń tolyq baǵdarlamasy Qazaqstandaǵy Eýroodaqtyń Facebook jelisindegi resmı paraqshasynda jarıalanǵan - @euinkz
