QR Joǵarǵy sotynyń sýdıasy Erbol Rahymbekov keshe Aqmola oblysynda oryn alǵan  oqıǵaǵa qatysty pikirin bildirdi. Eske salaıyq, jemqorlyq deregi boıynsha sottalyp jatqan 61 jastaǵy er azamat Aqmol aýylyndaǵy prokýratýraǵa myltyqpen kirip, esik aldynda otyrǵan prokýror men AİİB qyzmetkerin atyp tastady. Artynsha dalaǵa shyqqan ol saıası qýǵyn-súrgin qurbandaryna arnalǵan keshenniń janyna baryp ózine de qol jumsaǵan bolatyn.

Bul týraly Qamshy.kz  aqparat agenttigi karavan.kz-ke silteme berip jazady.

Zardap shekken quqyq qorǵaý organdarynyń qos qyzmetkeri aýyr jaǵdaıda aýrýhanada jatyr. Al, qaıtys bolǵan Ómirjan Jampozovtyń týystary bolsa prokýratýra tarapynan oǵan qysym jasalǵanyn KTK telearnasyna aıtyp bergen. Ol kózi tirisinde sý sharýashylyǵyna qatysty iri mekemeniń basshysy bolypty. Alaıda, quzyrly organdar oǵan 600 mln. teńgeni jymqyrdy degen aıyp taǵyp, sýdıadan 10 jylǵa qamaýyn suraǵan eken. Sottyń sheshimi keshe shyǵýy tıis bolǵan.

Búgin osy jaıtqa baılanysty QR Joǵarǵy sotynyń sýdıasy óz oıyn aıtty.

"Birinshiden, atalǵan is boıynsha málimetterdiń bári bizge qoljetimsiz. Bul tergeý barysynda belgili bolady. Iaǵnı, onyń ne úshin mundaı qadamǵa barǵany anyqtalady. Bálkim jeke basynyń arazdyǵy bolǵan shyǵar, bálkim prokýratýranyń ustanymymen kelispegen shyǵar. Oqıǵanyń dál prokýratýra ǵımaratynda bolýy sondaı kúdik týdyryp otyr. Al, sot otyrysyna keler bolsaq, is Jampozovtyń ólimine qatysty toqtaýy da múmkin. Biz aldyn ala bilmeımiz ǵoı, bálkim sýdıa ony aqtaıtyn úkim shyǵarǵysy kelgen shyǵar", - dedi Erbol Rahymbekov.