QR Investısıalar jáne damý mınıstri Jeńis Qasymbektiń aıtýynsha, kelesi jyldan bastap Qazaqstan azamattyq avıasıany tolyǵymen otandyq kerosınmen qamtamasyz etse, ushaq bıletteriniń baǵasy arzandaýy ábden múmkin, dep xabarlaıdy Qamshy.kz.

«Bizge jyl saıyn 800 myń tonna avıakerosın kerek. Qazirgi kezde Qazaqstandaǵy úsh munaı óńdeý zaýyty tek 300 myń tonnany berip otyr. Sol sebepti Reseıden satyp alýǵa májbúrmiz. Ol ónimniń baǵasy 30-40 paıyzǵa qymbat. Al osynyń bárin ózimiz óndirsek, bılettiń baǵasy da arzandaıdy. Sebebi bılettiń baǵasynyń 30-35 paıyzy - kerosınniń quny. Demek, kerosınniń baǵasy tússe, bılettiń quny da arzandaıdy», - dep atap kórsetti Qasymbek jýrnalıserge bergen suxbatynda.

Onyń aıtýynsha, Qazaqstanǵa 800 myń tonna kóleminde áýe janarmaıy qajet. Elimizdegi úsh munaı óńdeý zaýyty 300 myń tonna óndiredi, al bul jetkiliksiz. 

Osyǵan oraı Qazaqstan qalǵan janarmaıdy Reseıden jetkizedi, al bul óz kezeginde ushaq bıletiniń baǵasyna yqpal etedi. 

Aıta keteıik, otyrys barysynda mınıstr kelesi jyldan bastap azamattyq avıasıa otandyq kerosınmen tolyǵymen qamtamasyz etiletinin jetkizdi. 

Onyń atap ótýinshe, ushaq bıleti baǵasynyń 30-35%-yn áýe janarmaıynyń baǵasy quraıdy. Janarmaıdyń arzandaýy bul sıfrdi 20-25%-ǵa tómendetedi. 

Aıta ketsek, EXPO kórmesi qarsańynda Qazaqstanda áýebıletter aıtarlyqtaı qymbattady jáne jetispeýshilik baıqaldy. Tipti turǵyndar temirjol bıletteriniń de tapshy ekendigine shaǵymdandy. Áleýmettik jelilerde de Qazaqstannyń ushaq bıleti baǵasyn Batys elderimen salystyryp, «monopolıalanǵan» dep narazy baǵa berýshiler kóp.