Mańǵystaý oblysynda Beıneýden Ózbekstan shekarasyna deıingi avtomobıl jolyn jańǵyrtý jumystary bastaldy. Kólik dálizi Quryq portynan ózge elderge júk tasymaldaýǵa múmkindik beredi. Jol qurylysyna memleket qazynasynan 20 mlrd teńge bólingen.
«Beıneý-Aqjigit-Ózbekstan shekarasy» tas jolynyń uzyndyǵy 85 shaqyrymdy quraıdy. Eski joldy qaıta jańǵyrtý jumystarynyń bastalýyna ásirese Beıneý aýdanynyń jurtshylyǵy qýandy. Sebebi júzge tarta jergilikti turǵyn qurylys basynda eńbek etetin bolady.
Bolat Dosov, Beıneý aýylynyń turǵyny, aýdandyq máslıhat depýtaty:
-Ózbekstanǵa jol Ońtústik Qazaqstan oblysy boıynsha Saryaǵash aýdanynda ǵana bar eken. Endi mine, tas jol, avtomobıl joly salynatyn bolsa, irgeles jatqan, kórshiles jatqan memleketpen araqatynas, saýda-sattyq, ekonomıkalyq baılanys damı túsetini anyq. Sondaı-aq bizdiń eldi mekende kópshiligi osy kórshiles memleketten kóship kelgenine baılanysty ózderiniń týma-týysqandaryna, aǵaıyndaryna jol jaqyn bolatyn boldy.
Eki eldi jalǵaıtyn kúre jol qurylysy keler jyly aıaqtalady. Bul dálizdiń elimizdiń ekonomıkasyn damyta túsýde mańyzy zor. Kórshi memleketter atalǵan tas jolmen Quryq porty arqyly júk tasymaldaıtyn bolady. Qazir Qazaqstannyń jańa portynan Aqtaýǵa deıin de avtojol salynyp jatyr. Qurylys aıaqtalǵan soń Quryq portynyń múmkindigi eki esege deıin artpaq.
Eraly Toǵjanov, Mańǵystaý oblysynyń ákimi:
-Aınalamyzdaǵy Iran sıaqty memleketke, Reseı, búkil Kavkaz elderine, Túrikmenstan memleketine, Ózbekstanǵa tikeleı joldar ashylyp, búkil dúnıe júziniń qarym-qatynasynyń úlken qaqpasyna aınaldy. Orta eseppen eseptegende, 68 paıyzǵa deıin Qytaı memleketine shyǵatyn úlken joldyń toraby búginde osy Aqtaý, Mańǵystaý jeri arqyly ótip jatyr. Onyń bári táýelsiz Qazaqstannyń múmkindikterine jatady.
Beıneý aýdanynda jolmen qatar aýyz sý tapshylyǵy máselesi de sheshiletin boldy. Sarǵa aýylyna sý qubyryn tartý jumystary bastaldy. Aldaǵy jyly 200 otbasy óz úıinen taza aýyz sý ishetin bolady.
