HHİ ǵasyrda Qazaqstannyń damyǵan, básekege qabiletti jáne álemdegi bedeldi memleketter qatarynda qalyptasyp ári qaraı damýy úshin búgingi jastardyń qoǵamdaǵy róli erekshe. Elbasy «Nurly jol – bolashaqqa bastar jol» atty Qazaqstan halqyna Joldaýynda: «Men jastar – bizdiń bolashaǵymyzdyń tiregi degendi árkez aıtyp kelemin. Memleket jańa býynnyń aldynda barlyq esikter men joldardy ashty! «Nurly Jol», mine, bizdiń kreatıvti yrǵaqty jastarymyzdyń kúsh-jiger jumsap, qulash sermeıtin tusy osy!» - degen edi. Bul táýelsiz Qazaqstannyń bolashaǵy jastardyń qoldarynda ekenin bildiredi. Jastar úshin bul – úlken senim, zor jaýapkershilik. Osyny aqtaý úshin jastardyń boıynda shynaıy otansúıgishtik, elshildik qasıetter, ozyq bilim, parasat pen mádenıet bolýy shart.
Memlekettik jastar saıasatynyń 2020 jylǵa deıingi tujyrymdamasyn júzege asyrý aıasynda búgingi jastardyń qoǵamdaǵy rólin talqylaý maqsatynda Almaty tehnologıalyq ýnıversıtetinde “Jastar – azamattyqtyń úlgisi jáne olardyń qoǵamdaǵy róli” atty Almaty qalasy jastar uıymdarynyń qalalyq konferensıasy ótti.
Konferensıaǵa Almaty qalasy Jastar saıasatyn damytý memlekettik qory, Almaly aýdany ákimdigi, qaladaǵy 32 joǵary oqý oryndarynyń ózin-ózi basqarý stýdenttik organdary, jastardyń qoǵamdyq uıymdary men úkimettik emes uıymdardyń ókilderi qatysty.
Almaty tehnologıalyq ýnıversıteti Jastar keńesiniń qurylǵanyna 15 jyl tolýymen tuspa-tus kelgen konferensıa jumysynda qazirgi jastardyń ózekti máseleleri men olardy sheshý joldary, jastardyń áleýmettik, azamattyq-quqyqtyq, patrıottyq, ınovasıalyq jáne shyǵarmashylyq áleýetine qatysty máseleler talqylandy.
Konferensıanyń qonaǵy Almaty qalasy Almaly aýdany ákiminiń orynbasary Bekjanova Aınur Serikqyzy Elbasynyń «Nurly jol – bolashaqqa bastar jol» atty Qazaqstan halqyna Joldaýynda jastarǵa úlken mindet júktelip otyrǵanyn atap ótti. Jastar sol úshin óz bilimderin, bar kúsh-jigerin «Nurly jol – bolashaqqa bastar jol» jańa ekonomıkalyq saıasatynyń iske asyrylýyna baǵyttaýy qajet. Almaty tehnologıalyq ýnıversıteti ózin-ózi basqarý máselelerinde kóshbasshylardyń biri bolyp tabylady. Jastardyń ózekti máselelerin talqylap, tıisti sheshimin tabýda Jastar keńesiniń róli asa zor ekenin atap ótti.
Jastar saıasatyn damytý memlekettik qorynyń dırektory Seıitov Sovet Saýytuly «jastardyń bilim alańynda ATÝ Jastar keńesi bedeldi orynǵa ıe, sebebi ol jastardyń kóptegen ıgi bastamalaryn kóterip, qarqyndy jumystar jasaýda. Sondyqtan da Jastar saıasatyn damytý memlekettik qory Jastar keńesimen tyǵyz baılanysta birigip jumys jasaýǵa nıettimiz» - dep atap kórsetti óz sózinde.
«Osydan on bes jyl buryn Jastar keńesiniń qurylýy bolashaqtyń jarqyn bastamasy boldy dep nyq senimmen aıta alamyn. Jastar keńesiniń atqarǵan jumysy – jastar úshin baǵa jetpes tájirıbe. Jastarymyzdyń tyń ıdeıalar jınap, odan ári qaryshtap damýyna jol ashyldy. Jastar keńesi jumys jasaýdyń ınovasıalyq ádisterin únemi izdep-jetildirip, jastarǵa elikteý úlgisi ári qamqorshy bola bildi» - dedi óz sózinde ýnıversıtettiń birinshi prorektory, profesor Baýyrjan Nurahmetov.
“Nur Otan” partıasy Almaty qalalyq fılıalynyń jetekshi mamany Móldir Shaýharova óz baıandamasynda “Nur Otan” partıasynyń partıalyq jobalary arqyly jastar saıasatyn damytý máselesine toqtaldy. «Qazirgi tańda jastar saıasatyn tıimdi damytýǵa arnalǵan 12 maqsatty baǵdarlama iske asyrylýda. «Jastar – Otanǵa!», «Sátti qadam», «Jastar kadrlyq rezervi», t.b. partıalyq jobalar jastardyń eńbek naryǵyndaǵy básekelestigin arttyrýǵa, qazirgi zamanǵy bilikti basqarýshylar shoǵyryn qalyptastyrýǵa baǵyttalǵan» - dedi ol.
«Búgingi tańda jastardy, ásirese jumyspen qamtý isi ózekti máselege aınalyp otyr. Bul jerde, bilim berý júıesi men eńbek naryǵy arasyndaǵy sáıkessizdik pen alshaqtyqtyń sebebinen, joǵary oqý oryndaryn bitirgen jastar sol alǵan bilimderin óndiris oryndarynda paıdalana almaı keledi. Jastar uıymdary osy máselege basa nazar aýdaryp, osyndaı otyrystar uıymdastyryp, óz oılaryn ortaǵa salýlary tıis» - dedi óz kezeginde VTB Qazaqstan bankiniń satý jáne jeke tulǵalarǵa qyzmet kórsetý bóliminiń bastyǵy, Jastar keńesiniń burynǵy tóraǵasy Arman Bekebaev.
Qazaqstan Prezıdentiniń jastardy eldiń damýyna kúsh-jigerlerin salyp úles qosýǵa úndeýi konferensıaǵa qatysqan jastar tarapynan úlken qoldaý tapty. Sonymen qatar, konferensıa barysynda jastarǵa qatysty ózekti máseleler talqylanyp, olardy sheshý joldaryna oraı ár túrli usynystar aıtyldy. «El jastarynyń maqsaty bir, jetistikteri mol, Elbasy alǵa qoıǵan ortaq maqsat úshin barlyǵymyz birlesip, jumys jasaıyq» degen usynys-oılarǵa barlyq jastar qyzý qoldaý bildirdi.
Konferensıa jumysyn qorytyndylaǵan ATÝ tárbıe isi jónindegi prorektory Qaltaı Batholdın: «Elimizdiń erteńi – jastar. Elbasy óziniń bıylǵy «Nurly jol – bolashaqqa bastar jol» atty halyqqa Joldaýynda jastarǵa úlken úmit artatyndyǵyn jetkizdi. Sondyqtan, Táýelsizdiktiń damý dańǵylyn Nurly jolǵa aınaldyrý jolynda eshqandaı qıyndyqqa qaramaı, qajyrly eńbek etetin, qoǵamdyq máselelerdi sheshýge barynsha atsalysatyn ýaqyt jetti. Jańa qazaqstandyq patrıotızm bul – Máńgilik El ıdeıasy. Ol – uly qundylyq! Eldiń biriktirýshi kúshi. Osy jolda Elbasynyń senimin aqtaý – sizder, jastardyń aldaǵy eń basty maqsat-mindetterińiz» - dedi ol.
Asqat Ábishev
