Soltústik Qazaqstanda shoshqa fermasynda 120-dan astam shoshqa órtenip ketti dep habarlaıdy Qamshy.kz aqparat agenttigi oblystyq tótenshe jaǵdaılar jónindegi departamenti málimetine súıenip.
Baspasóz qyzmetiniń málimetinshe, 20 shilde kúni saǵat 18:39-da Taıynsha aýdany Taıynsha qalasynyń №17 órt sóndirý bólimshesine "Merıan" JSHS dırektory habarlasyp, aýdan ortalyǵynan 14 shaqyrym qashyqtyqtaǵy Novoıvanovka aýylynda shoshqa kesheni órtenip jatqanyn jetkizgen.
"Qońyraý boıynsha órt sóndirýshiler birden attanyp, tótenshe oqıǵa ornynda aýmaǵy 3 myń 600 sharshy metr ǵımarat laýlap janyp, kók tútinge oranǵanyn kórgen. Órt týraly habar keshiktirilip jetkizilgendikten, jalyn úlken aýmaqty alyp ketipti. Órt saldarynan bastapqy málimet boıynsha 28 shoshqa men 95 toraı qyryldy", — dep málimet berdi Tótenshe jaǵdaılar jónindegi departament.
"Órt sóndirýshilerdiń biliktiligi men shapshańdyǵynyń arqasynda, shoshqa kesheniniń basqa ǵımarattaryn aman alyp qaldyq, keshen jumysshylary zardap shekken joq", — dedi vedomstvonyń órt sóndirýdi uıymdastyrý jáne apattyq qutqarý bóliminiń basshysy, azamattyq qorǵanys podpolkovnıgi Dmıtrıı Rábenko.
Bastapqy boljam boıynsha, órtke qysqasha tuıyqtalý sebep bolǵan eken.
