Meksıkada Garrero shtatynyń  stýdentteri úkimet basshysy Enrıke Peno Netonyń 6 kún ishinde otstavkaǵa ketýin talap etip otyr. Bul týraly RıaNovostı habarlaıdy.

Stýdentter jeksenbi kúni Garrero shtaty Chımpalsıngo qalasynda eki birdeı radıostansıany basyp alyp, tikeleı efırden prezıdentteriniń otstavkaǵa ketýin úndegen.

Narazylyq sherýin uıymdastyrýshy stýdentter belsendisi: « 26 qarasha bizdiń dostarymyzdyń joǵalǵanyna týra 2 aı bolady. Al osy kúnge deıin biz bıliktiń aýzynan olardy izdeý jumystaryna atústi qarap, jalǵan aqparat bergenderin bilemiz» deıdi.

Igýalada stýdentter 26 qyrkúıek kúni eldiń bilim berý júıesine qarsylyqtaryn bildirip, alańǵa shyqqan bolatyn.  Igýalanyń eks-meri Hose Lýısa Abarkıdiń buıryǵy boıynsha olarǵa qarsy shabýyl oryn alǵan.  Nátıjesinde 6 stýdent oqıǵa ornynda qaza tapsa, 43 stýdentti polısıa jasaǵy alyp ketken bolatyn. Keıin anyqtalǵandaı ustalǵan stýdentterdi polıseıler qylmystyq top «Birikken jaýyrgerlerdiń» qolyna tabystaǵan.

Sodan bergi ýaqyttarda Meksıkada narazylyq sherýleri jıi uıymdastyryla bastap, ashynǵan halyq ákimshilik ǵımarattaryna shabýyl jasaı bastaǵan. Kólik joldaryn jaýyp, qarsylyqtaryn kúsheıtken. Al Igýalynyń eks-meri jubaıy ekeýi qashyp ketkenimenen kóz uzamaı ustalyp, oǵan qosa ondaǵan polıseı qyzmetkerleri qamaýǵa alynǵan bolatyn.