Kókshetaý qalasyndaǵy 150 páterli bes turǵyn úıdi paıdalanýǵa berý merzimi keshiktirilýine qatysty Turǵyn úı qurylys jınaq banki janyndaǵy Qoǵamdyq keńeske bank klıentterinen jıi shaǵym túsip jatyr. Aqmola oblysynyń ákimdigimen jasalǵan kelisim boıynsha, jalpy aýdany 9,9 myń sharshy metr bolatyn «Vasılkovskıı» yqshamaýdanyndaǵy úıler 2014 jyldyń qyrkúıek aıynda aıaqtalýǵa tıis edi. Aqyry salynyp bitti. Alaıda komýnıkasıanyń joqtyǵynan turǵyndar jańa úıge áli kire almaı otyr.

 Bul másele 22 qyrkúıekte ótken Turǵyn úı qurylys jınaq banki janyndaǵy Qoǵamdyq keńestiń ekinshi otyrysynda talqylanǵan bolatyn. Ol kezde ákimdik ókilderi «jańa qonys ıeleri uzaq kútken páterlerine jyl sońyna deıin kiredi» dep sendirgen. Biraq sodan beri QTQJB salymshylary-pýlǵa qatysýshylardyń shaǵymy kóbeımese, azaıǵan joq.

Turǵyndardyń aryzyna qaraǵanda, Kókshetaý qalasynyń shetinde salynǵan «Vasılkovskıı» yqshamaýdanynda komýnıkasıa túgili, bul aýmaqtyń ózi jaıly emes, munda jol da, trotýar da, jaryq ta joq. QTQJB basshylyǵy turǵyndardyń jańa páterge qonystanýyna deıin bul jerdi jaılylandyrýǵa jáne kólik ınfraqurylymyn jasaýǵa qatysty barlyq máselelerdiń túıini sheshiler degen úmitin jetkizdi. Olaı bolmasa, bul úıdiń turǵyndary órkenıettiń barlyq ıgiliginen shet qalmaq.

Ahýaldy jergilikti jerde qarastyrý maqsatynda 2014 jyldyń 18 qarashasynda QTQJB janyndaǵy Qoǵamdyq keńes Aqmola oblysynyń Kókshetaý qalasyna kelip, birden qurylys alańyna bardy.

«Jasyratyny joq, Qoǵamdyq keńestiń alǵashqy kóshpeli otyrysyn Kókshetaýda ótkizýge sheshim shyǵarǵany biz úshin kútpegen jaǵdaı boldy», – deıdi QTQJB Aqmola fılıalynyń dırektory Aıbas Jarqymbaev. «Biz Kókshetaý qalasy men Aqmola oblysy ákimdikterimen birge tyǵyryqtan shyǵatyn joldy izdestirip jatyrmyz. Seıitqazy Mataev jáne Sergeı Ponomarev sekildi bedeldi azamattardyń qoldaýynyń arqasynda biz Vasılevskıı yqshamaýdanyndaǵy máseleni qysqa merzim ishinde salymshylarymyzdyń paıdasyna sheship bere alamyz dep oılaımyn», – dep túıindedi Jarqymbaev.

Qoǵamdyq keńes músheleri, qala ákimdiginiń ókilderi jáne qashan páterge kiretin kúndi saryla kútken salymshylar    yqshamaýdan máselesin qurylys alańyndaǵy bir páterdiń ishinde talqylady.

«Bul úılerge kirgen adamdar mundaı máselelermen kúrespesten, qýanyp, páterlerin qalaı jaıly etýdi oılaýǵa tıis, bul úshin bárin jasaý qajet», – deıdi QTQJB janyndaǵy Qoǵamdyq keńes Tóraǵasy Seıitqazy Mataev. «Onyń ústinde salynǵan úılerdiń sapasy óte jaqsy, kirpishten turǵyzylǵan, jyly. Páterlerdiń josparlanýy da sátti shyqqan. Adamdarǵa jaıly bolýy úshin bári jasalǵany kórinip-aq tur. Endi tek bastalǵan isti aıaqtaý qajet. Aýmaqty jaılylandyryp, komýnıkasıa tartý kerek», – dep qorytyndy jasady Seıitqazy Mataev.

Kókshetaý ákiminiń m.a. Amangeldi Smaılov 2014 jyldyń jeltoqsan aıynyń aıaǵyna deıin  komýnıkasıaǵa qatysty máseleni sheshýge ýáde berdi. Alaıda yqshamaýdandy jaılylandyrýdy kóktemge qaldyrýdy usyndy. Ýaqytsha shara retinde qala bıligi aýmaqty tegistep, úılerdiń podezine baratyn joldarǵa tas tóseýge ýáde etti. Osyndaı jartylaı sharalarǵa qanaǵattanǵan pýlǵa qatysýshylar jumys aıaqtalysymen qujattardy rásimdeýdi bastaı alady.

Jańa Vasılevskıı yqshamaýdanyndaǵy taǵy bir másele –  qolaısyz podezd. Oǵan jetý úshin trassadan aınalyp, birneshe shaqyrym jer júrýge týra keledi. «Adamdar balalaryn mektepke, balalar baqshasyna aparýǵa múmkindigi joq», – deıdi Qoǵamdyq keńes múshesi, tanymal telejúrgizýshi Sergeı Ponomarev, –  «Úı paıdalanýǵa berilýge ázir, biraq jol áli joq».

 Ákimdik basshylyǵy buǵan da ýaqytsha shara  qoldanýdy, ıaǵnı úlken jolǵa deıin tas tógýdi usynyp otyr. Muny 2015 jyldyń jazynda oryndamaq. Ázirge yqshamaýdan tolyq aıaqtalmaıdy, turǵyndarǵa osy joldy paıdalanýǵa   týra keledi.

Ótken jıynǵa kelgen QTQJB klıentteriniń kóbi páterlerine tezirek kirý úshin qolaısyzdyqtarǵa tózýge ázir ekenin bildirdi. Alaıda bul yqshamaýdandaǵy naǵyz qıyndyq kóktemde, qar erigen kezde týýy yqtımal. Turǵyndar tizege deıin batpaqqa batyp qalýy yqtımal. Olar kóktemde de jol men trotýardyń joqtyǵyna kóndige me, joq pa, ol jaǵyn ýaqyt kórsete jatar. Ázirge jıynǵa qatysýshylardyń bári sharttyń ózine tıesili bóligin oryndaýǵa ýaǵdalasty. Ákimdikter jaryq, jylý, sý berip, kanalızasıa salmaq. Al klıentter bolsa, barlyq jumys aıaqtalǵansha tóze turmaq.